“Membru PNTL Baukau Entrega Atributu Arte-Marsiais”

.

Jornal Independente - Kuarta-feira, 07 Agusto 2013 

Membru Polisia Nasional Timor-Leste (PNTL), Distritu Baucau ne’ebe uluk mete iha atividade arte-marsiais hahu entrega ona sira nia atributu ba komandu PNTL Distritu Baucau. 

Komandante Distritu Baucau, Superitendente Xefe Eugenio da Costa hateten, oras ne’e nia membru sira ne’ebe mak uluk envolve iha arte-marsiais entrega ona sira nia atributu ba komandu Distrital nian. 

“Membru balun sira hahu ona ho volontariu entrega sira nia atributu liu husi sira nia komandante,” tenik nia, iha Samagia-Baucau, horseik. Nia hatutan, membru iha Distritu ne’e koopera diak tebes no promete sei kontribui maka’as ba estadu hodi serve povu la’os arte-marsiais. 

“Hau nia membru husi Sub-Distritu Venilale oras ne’e tau hamutuk ona sira nia atributu, arte-marsiais nian no iha loron 23 Agostu 2012 sei entrega mai ami,” dehan nia. 

Eugenio hateten, bazeia ba rezolusaun ne’ebe mak fo sai ona atu taka total arte-marsiais, nia parte apela ona ba nia membru tomak atu bele halo parollamentu hodi rekolla atributu arte-marsiais iha Distritu Baucau tomak.

.