“Lu-Olo: FRETILIN Mak Funda FALINTIL”

,

Jornal Nacional Diario - Kuarta-feira, 21 Agusto 2013 

Presidenti Partidu FRETILIN, Francisco Guterres ‘Lu-Olo’ hateten, Forsa Armada da Libertasaun Nasional Timor-Leste (FALINTIL) ne’e Partidu FRETILIN mak funda. 

Tamba ne’e Lu-Olo dehan katak, kokemorasaun loron FALINTIL ne’e mos nu’udar loron espesial ba Partido FRETILIN, tamba husi FRETILIN mak FALINTIL moris. 

“Loron FALINTIL ne’e, hau aproveita fo parabens ba FALINTIL no ba ami nia maun alin funu nain ne’ebe mak luta iha tinan 24 nia laran, loron ida ne’e komemorasaun FALINTIL nian maibe especial mos ba loron FRETILIN nian, tanba FRETILIN mak fundador ba FALINTIL nian hodi sai hanesan exercito hodi defende independensia Timor Leste nian,” Mensajen ne’e Prezidenti Partidu FRETILIN, Lu-Olo, segunda (19/8) hodi fo mensazen ba loron FALINTIL ba dala 38 nebe komemora iha 20 Agusto horseik. 

 Eis Prezidenti parlamentu Nasional ba Primeiru Lejislatura ne’e hateten loron FALINTIL 20 Agusto hanesan loron istoria ba FALINTIL no FRETILIN, tanba FALINTIL mosu hodi defende ho instrusaun diresaun FRETILIN nian hodi halo funu to’o tinan 24 nia laran, maske mate mohu maibe exercito aswain sira nia ezerse funsaun ho dever hodi hari FALINTIL, tamba ne’e ho onra fo omenazen ba saudozu sira ne’ebe mak fo an ba mate, fakar ran no sofrementu. 

“Selebrasaun ne’e atu relembra fali istoria FALINTIL hanesan mos FRETILIN nian tamba ne’e hanesan nasaun independensia ho orgaun hat ita servisu maka’as para hadiak ita nia rain hodi valoriza funu nain sira ne’ebe mate, tanba ne’e ita ne’ebe mak moris hela servisu maka’as para fo dignidade ba povu maubere,” dehan Lu-Olo. 

Iha fatin hanesan Sekretariu jeral Partidu FRETILIN, nudar mos Fundador FALINTIL, Mari Alkatiri afirma katak, FALINTIL Forsa defeza nasional tanba ne’e ho ispiritu estadu nian bele sai diak liu tan. Eis Primeiru Ministru ne’e hateten, dala barak selebrasaun loron FALINTIL halua tiha FALINTIL nia orijen, tanba ne’e Sekretariu jeral Partidu FRETILIN ne’e hanoin katak, politiza FALINTIL maibe tamba istoria ne’ebe iha sai ona identidade nasaun Timor-Leste nian. 

 “Hau hateten fila-fali katak, FALINTIL uluk moris husi FRETILIN mak hari FALINTIL nudar liman kroat povu nian hodi luta ba libertasaun, FALINTIL moris iha dia 15 Agusto no loron 20 Agusto hanesan adezaun boot husi tropa Timoroan sira iha Portugues nian,” Konta Alkatiri. 

Husi istoria ne’ebe iha Sectretariu Jeral Partidu FRETILIN ne’e dehan F-FDTL hanesan Forsa Estadu nian tanba ne’e tenki banati tuir luta ba ukun an nian, labele ho influensia politika no partidaria maibe la’o nafatin hodi defende konstituisaun no Estadu direitu no Demokratiku. 

,