Aniversariu Governu Bloku Koligasaun Ho Reflesaun “Dom Ricardo Konkorda Remodelasaun”

.

Jornal Nacional Diario - Kuarta-feira, 07 Agusto 2013 

Governu Bloku Koligasaun (BK) Kinta-feira loron 8 fulan Agustu aban kompleta tinan ida governu Kintu Governu Konstitusional (8/8/2012-8/8/2013). 

Selebrasaun ba tinan ida governasaun Bloku Koligasaun ne’e sei la halo festa boot maibe sei selebra ho reflesaun hodi refleta tinan ida pregrinasaun governu ne’e atu bele hatene susesu, dezafius no falansu nebe governu ne’e iha. 

Reflesaun membru Governu tomak ne’e sei diriji direitamente husi Primeiru Ministru, Kay Rala Xanana Gusmao nebe akompania mos Vice Primeiru Ministru, Fernando La Sama de Araujo. 

Reflesaun sei halao durante loron 3, hahu sesta loron 9 to’o Segunda feira loron 12 fulan Agustu, iha Dare, Reflesaun ne’e sei halo avaliasaun ba servisu membru governu ida diak. 

Atu realiza retiru avaliasaun ne’e, Primeiru Ministru, Kay Rala Xanana Gusmao fo ona orientasaun ba Prezidenti Konselu Ministru (PKM) hodi fahe informasaun liu husi SMS ba membru Governu aira atu partisipa hotu iha retiru ne’ebe mak sei halo iha Dare. Tuir Vice Ministru Transporte komunikasaun (MTK), Flavio Cardoso ba Jornalista iha caicoli, Dili, Tersa (6/8), informa katak,”Durante ne’e la iha konvite, mas introdusaun deit husi Presidenti Konsellu Ministru mak fo SMS, antes ne’e mos PM Xanana hateten tiha ona ba membru Governu,” esplika Flavio Cardoso. 

Antes ne’e, ema barak ona koalia katak, isu remodelasaun mak sei sai topiku interesante iha retiru, maibe Flavio Cardoso, rasik la hatene. Iha oportunidade ne’e mos, Flavio Cardoso haktuir hikas, deklarasaun Primeiru Ministru ne’ebe mak hatete, tinan ida ne’e ministeriu ida-idak tenke hadia ninia uma laran, ne’ebe Ministeriu ida ne’e konsidera deklarasaun Primeiru Ministru ne’e maximu tebes atu bele estabelese no hodi buat balun ne’ebe mak seidauk hadia. 

Husi sorin seluk, Bispo Diocese Dili, Mgr. Alberto Ricardo da silva, konkorda ho Planu Primeiru Ministru (PM) Kay Rala Xanana Gusmao nian, atu halo remodelasaun ba estrutura V Governu Konstitusional, nune’e, bele hetan formatu governasaun ida ne’ebe diak hodi lori moris diak ba povu ho nasaun. 

“Bele halo remodelasaun ba membru Governu balun, maibe tenke halo ho diak ba nasaun Timor-Leste,” Afirma Bispo Alberto Ricardo da Silva ba jornalista iha seminariu Ailok Laran, Dili, Segunda (5/7). Dom Alberto Ricardo konkorda PM Xanana bele halo remodelasaun ba membru Governu ne’ebe servisu la los, importante mak remodelasaun ne’e tenke iha objetivu ida katak, atu lori diak ba povu hotu. “Ita la bele halo remodelasaun ida ne’ebe lori terus naruk ba ita nia povu,” afirma Dom Alberto. 

Dom Alberto sublinha katak, tempu agora laos ona atu povu terus, maibe sai ona husi terus, tanba ne’e mak governu sira buka haka’as an servisu atu halo diak ba povu hodi goza nia ukun rasik an ida ne’e. 

Antes ne’e, Director Luta Hamutuk (LH), Mericio Akara husu ba Primeiru Ministru Kay Xanana Gusmao, atu hasai tiha membru Governu ne’ebe mak laiha kapasidade atu hala’o servisu. 

Tuir Luta Hamutuk nia hare bainhira Governu mak laiha kontrolu no husik hela deit membru Governu sira neebe servisu la hatene, maibe kontinua nafatin iha strutura V Governu, ida ne’e halo osamentu povu nian fakar arbiru deit, maibe la iha rezultadu no benefisia ba povu no rai Timor rasik. 

Tuir Luta Hamutuk nia peskiza mos katak, Ministru balun deit sira nia mandatu besik tinan rua ona, maibe ezekusaun orsamentu foin to’o 30%, ida ne’e hatudu momos sira la iha kapasidade, tanba ne’e LH husu tenki halo remodelasaun.

.