“Populasaun Apoiu Governu Taka OAM Iha TL”

.

Jornal Nacional Diario - Tersa-feira, 09 Julho 2013 

Populasaun sira iha kapital Dili apoiu desizaun Governu konstitusional ba dalima nian ne’ebe taka totalmente Organizasaun Arte Marsiais (OAM) iha nasaun ida ne’e, tanba tuir sira durante ne’e mosu problema kriminal ruma sempre husi artemarisias mak halo. 

“Hau hanesan estudante Universitariu ida fo apoiu tomak ba Primeiru Ministru Xanana Gusmao nian hanoin ne’ebe deklara sai husi media sira katak, agora ba oin hasai ona rezolusaun hodi taka totalmente aktividade organizasaun arte marsiais iha Timor-Leste relasiona ho problema oho malu ne’ebe mak kontinua hala’o beibeik iha rai ida ne’e,” hateten Juven de Araujo, Estudante UNTL Iha Licidere Dili (8/7). 

Juven hatutan, iha nasaun ida laiha organizasaun arte-marisias mak boot liu fali Estadu, tanba ne’e desizaun ne’ebe fo sai husi Governu liu husi PM Xanana Gusmao ne’e legal, atu nune’e bele halo situasaun iha estabilidade, maibe husu governu atu kria nafatin komisaun independente atu halo investigasaun kelan ba asuntu refere. Iha fatin hanesan, Joanito do Rego B. 

Juventude husi Becora, mos fo apoiu total ba Primeiru Ministru xanana Gusmao atu taka totalmente aktividade organizasaun arte marsiais sira ne’ebe mak kria beibeik problema iha nasaun ida ne’e. “Hau hanesan Joventude ida, apoiu tebes PM xanana nia hanoin hodi taka totalmente organizasaun arte marsiais ne’ebe mak gosta kria beibeik problema, tanba sira mak bele sai fali impedementu ba dezenvolvimentu nasaun ne’e,” Joanito hateten. 

 Joanito promete, hanesan joventude sei halo mos kontrolu iha sira nia bairo, nune’e kuandu hetan membru organizasaun arte marsiais balun mak uza uniforme ka farda hodi lao arbiru iha abiro, sei informa ba xefi Aldeia, xefi suku no mos ba Polisia atu kaer sira ba prosesu tuir lei ne’ebe mak estabelese. 

 Nune’e mos, Pereira A Maya, Juventude Bairopite ne’ebe mak oras ne’e tuir hela kursu lian Korea hateten, nia apoiu 100% ideia PM Xanana nian hodi taka totalmente aktividade artemarsiais iha nasaun ida ne’e. 

“Hau bele dehan ita nia Primeiru Ministru ne’e, hatene klaru povu tomak iha nasaun ida ne’e nia hakarak mak estabilidade, unidade no hakmatek, entaun se iha grupu ka organizasaun artemarsiais ida ou rua mak atu halo fali instabildiade iha nasaun ida ne’e, diak liu taka to’o rai naben tiha deit, lalika halo sira eziste tan iha nasaun ida ne’e,” Pereira hateten ho nervozu.

.