PM Xanana Promete Remodelasaun: “FRETILIN Seidauk Simu Konvite Tama Governu”

.

Jornal Nacional Diario -Kuarta-feira, 17 Julhu 2013 

Informasaun ba remodelasaun Kintu (V) Governu ne’e klaru ona tamba, Primeiru Ministru Kay Rala Xanana Gusmao rasik promete atu halo remodelasaun ba governu ne’e. 

Remodelasaun Governu ne’e. Remodelasaun Governu ne’e mosu espekulasaun oioin iha komunidade nia leet katak, partido FRETILIN mos sei tama governu ne’e kuandu Primeiru Ministru halo remodelasaun. Ba informasaun sira ne’e, membru Comite Central FRETILIN (CCF) nudar mos deputadu Parlamentu Nasional, Estanislau Aleixo da Silva hatete katak, to’o ohin loron FRETILIN seidauk simu konvite husi Primeiru Ministru atu partisipa iha Governu. 

“Seidauk iha konvite ofisial ida, i hau (Estanislau) mos foin dadauk hetan malu ho PM iha enkontru privadu ida mais ami koalia buat seluk, hau hetan nia i ami koalia maibe koalia kona ba asuntu interese nasional nian, maibe la koalia kona ba remodelasaun nian, i ami mos la entrega lista ba Primeiru Minsitru,” deklara Estanislau Aleixo da Silva ba JNDiario Tersa (16/7) iha Parlamentu Nasional. Membru Comite Central FRETILIN ne’e mos rejeita informasaun balun ne’ebe dehan Partidu FRETILIN aprezenta ona lista membru Governu nian ba Primeiru Ministru, Kay Rala Xanana Gusmao. 

Estanislau mos hatutan tan katak, dadaun ne’e FRETILIN seidauk prepara ema hodi ba tur iha Governu, maibe FRETILIN prepara nia ema atu hasoru eleisaun 2017 mai. 

Estanislau mos koalia, durante ne’e ema barak halo espekulasaun katak partidu FRETILIN sei envolve iha Governu bainhira remodelasaun akontese, maibe nia parte seidauk bele koalia kestaun ne’e tanba, ne’e kompetensia Governu nian. 

 Nia dehan, bainhira kuandu PM Xanana Gusmao konvida FRETILIN partisipa iha Governasaun, mas FRETILIN mos sei tetu didiak lai. “Bainhira PM hato’o konvite ruma ba FRETILIN, FRETILIN mos tenki tetu didiak hanesan partidu hodi haree katak see partisipa oinsa no iha Ministeriu ne’ebe, area kompetensia ne’ebe inklui sei deit maka bele,” akresenta nia. 

Deputadu Estanislau hateten, Partidu FRETILIN pronto nafatin hodi kontribui ba Estado no Governu ba dezenvolve nasaun iha parte hotu-hotu. 

Deputadu Bancada FRETILIN ne’e observa moa katak, to’o ohin loron Governu Bloku koligasaun ladauk rejolve problema area saude no infraestrutura i pior liu tan problema iha area refere kontinua aumenta ba bei-beik. 

 “Realidade hatudu buat barak mak lao la diak, pori-jemplu ezekusaun osamental ne’ebe to’o ona fulan nen maibe iha nia ejekusaun orsamentu tun inklui mos problema saude kontinua rungu ranga, projeitu bar-barak ne’ebe aprova kuaze la lao, estrada at nafatin e at liu tan,” lamenta Estanislau. 

 Realidade sira ne’e PM Xanana mak haree no halo avaliasaun ba nia membru Governu kona ba servisu no rejultadu kada Ministeriu nia hodi halo desizaun halo remodelasaun ou labele halo remodelasaun, ida ne’e kompetensia PM nian.

.