“MP Xanana Lori Dokumentu KKN Mahar Ba KAK”

,

Jornal Independente - Segunda-feira, 08 Julho 2013 

Primeiru Ministru Kay Rala Xanana Gusmao lori dokumentus mahar ne’ebe importante kona ba indikasaun Kolusaun Korupsaun no Nepotismu (KKN) ba Komisaun Anti KOrupsaun (KKN). 

Primeiraves KAK bolu no husu apoiu PM Xanana Gusmao nian atu bele kontribui dokumentus balun ne’ebe indika mosu KKN iha GOvernasaun agora. 

Tuir observasaun diario ne’e katak, Xanana lori diretamente dokumentus mahar ne’ebe kesi ho tali raffia hatuun husi kareta no simu diretamente husi komisaun KAK, Aderito de Jesus no Adjundu Komisaun KAK, Manuel Bucar iha odamatan oin. 

“KAK bolu hau mai atu entrega dokumentus kona ba prosesu estrada Dili laran ho Ponte Komoro II, ne’ebe hau intrega barak liu ho prosesu barak, hodi premiti ba KAK atu iha nia konesementu diak kona ba prosesu sira ne’e,” dehan Xanana, sesta liu ba hafoin entrega dokumentus ba KAK, durante minutu 30 iha sala KAK nian. 

“Ita tenki esplika ba malu saida mak akontese ba ita nia rain, KAK bolu hau loron 11 de Julhu besik fulan ida, hau hare diak liu hau entrega dokumentu hotu-hotu, para KAK estuda tiha bele husu bah au, iha lei ne’ebe kria KAK, iha artigu 24 nomor 8 dehan dever kolaborasaun husi instituisaun hiotu, hata’an hau tuur iha Governu nuudar mos sidadaun ida,” tenik nia. 

Xanana dehan, hafoin nia entrega prosesu dokumentus hotu ne’ebe deskonfia mosu KKN ne’e ba KAK hodi estuda, no depois bele halo pregunta ba nia hodi responde iha temu saida deit, bainhira KAK presija nia. 

“KAK bele halo ijame ba livru prosesu dokumentus hodi ajuda ba KAK, hau ajuda hodi fo kbiit ba sira hodi halo pergunta saida-saida de’it, KAK simu hodi asina, hau dehan katak, depois hare tiha dokumentus hau sente obrigadu tuir lei, hau tenki mai hodi kolabora,” nia informa. 

Iha parte seluk, maske jornalista tenta konfirma asuntu ne’e ba Komisaun Anti Korupsaun (KAK) Dr. Aderito de Jesus la kohi fo komentariu tanba prosesu ne’e sei segredu justisa. 

Tuir dadus ne’ebe Jornal ne’e rekoila katak, prejensa Xanana iha KAK atu responde programa servisu Governu nian ne’ebe implementa deskonfia mosu KKN boot iha projetu hadi’a emerjensia estrada Dili no harii Ponte Komoro II no projeitu seluk tan.

.