“Membru Governu Servisu Labele Hein De’it PM”

.

Jornal Nacional Diario - Segunda-feira, 08 Julho 2013 

Sosieade sivil Luta Hamutuk (LH) husu membru Governu sira atu displina no servisu maka’as, ejekuta planu no programa nune’e bele lori dezenvolvimentu hodi hasai povu husi pobreza, laos servisu hein de’it orientasaun Primeiru Ministru (PM). 

Tuir Mericio Akara, membru Governu nu’udar liman ain Primeiru Ministru, sira mak tenki aslera programa sira ne’e, labele hein de’it PM dehan A mak sira A, dehan B mak sira B, depois sira hotu ba liur organiza feira. 

LH nia observasain katak, bainhira enkontru Konsellu Ministru, membru Govenru laiha planu atu aprezenta iha meza atu debate hodi hetan resposta husi PM, maibe hein deit PM Xanana nia orentasaun. 

“Sisitema ne’ebe adapta mak tenki loyal ba Primeiru Ministru, la signifika buat hotu PM mak sei tui-tuir hodi orenta, hanesan Ministru nonok kreatif hodi kria planu laos hamosu deit mak srimonia pois la lao tuir to’o ikus a’at fali hotu ne’e estraga povu nia osan deit,” dehan Diretur Ezekutivu LH Mericio Akara, Sesta (5/7) iha nia kna’ar fatin Farol, Dili. 

 Nia afirma, se Primeiru Ministru Kay Rala Xanana Gusmao hatete halo remodelasaun tenki iha komitmentu halo remodelasaun, labele halo deit stetmentu politiku ita hein ba hein mos la akontese, ejekusaun la lao diak. 

Tantu antes ne’e, Diretur Interinu HAK fo ninia hanoin katak, Se PM Xanana senti nia membru halo serviso lalos tenke troka, presiza hanoin didiak. 

Nune’e mos Viriato Soares Pereira nudar Staf Advokacy FONGTIL hatete, atu remodela ka lae depende ba PM, tanba nia mak hatene liu servisu nia membru sira nia, importante mak lori dezenvolvimentu ba povu.

.