“Lere Duvida Jerasaun Foun Lidera F-FDTL”

.

Jornal Nacional Diario - Kinta-feira, 25 Julhu 2013 

Xefi Estadu Maior Jeneral FALINTIL-Forca Defeza Timor-Leste (F-FDTL) Maijor Jeneral, Lere Anan Timur, duvida ho jerasaun foun sira atu lidera instituisaun F-FDTL. 

 Lere dehan, Comandante Componente sira atu intrega ba jerasaun foun atu kaer maibe nia duvida oituan tanba sira joven ho joven sira ne’e komanda malu ne’e fiar malu ka lae? 

“Ami haree atu tau joven sira ne’e ba komandantes das unidades mais sinti difisil ituan tanba ami kestiaona Joven komanda malu ne’e rona malu ka lae? 

Ami hasai konkluzaun katak dala ruma la rona malu duni,” dehan Lere ba Jornalista sira iha Kuartel jeneral Fatuhada, Kuarta (23/7). 

 Tanba ne’e mak Lere informa, sira nia parte desidi atu tau joven ida hamutuk ho sira ne’ebe idade bot ne’e mak komanda iha unidade ida ka komponente ida. 

 “Oras ne’e ita tau ona Joven sira hamutuk ho katuas balun mak komanda iha komponente apoia servisu, terestre, Centro Treinamentu Metinaru, komandante tau joven tanba sira ita rekruta joven, maibe iha komponente Naval Veteranu deit mak komanda iha ne’eba,” sublina Lere. 

 Lere hatutan, tina oin atu halo re-estruturasaun iha F-FDTL laran atu entrega ba jerasaun foun sira hodi lidera instituisuan ne’e, tanba ne’e mak husu ba ofisiais sira atu prepara a’an didiak hodi bele lidera nia soldadu sira. 

Maibe Lere afirma, atu sai lideransa superior sei halo avaliasaun ba sira, avaliasaun ne’e la hare ba nia matenek maibe haree liu ba ninia hahalok, katak nia bele duni atu sai lideransa ka lae, tanba ohin loron iha tentasaun oioin. 

.