“Lere Duvida Jerasaun Foun Komanda Malu”

.

Jornal Independente - Kuarta-feira, 24 Julhu 2013 

Komandante Jeral FALINTIL-Forsa Defesa Timor Leste (F-FDTL) Maijor Jeneral Lere Anan Timur sei duvida ho jerasaun foun sira atu lidera komponente naval. Eis Komandante FALINTIL nu’udar mos veteranu ida ne’e sei la fiar jerasaun foun atu komanda malu iha instituisaun F-FDTL laran. 

“Ami haree ba komandantes das Unidades mais senti difisil oituan ami kestiaona joven sira komanda malu, ne’e rona malu ka lae, ami hasai konkluzaun katak dala ruma la rona malu duni,” dehan Lere ba Jornalista sira, iha Kuartel jeneral Fatu-Hada, Dili (23/7). 

Tanba ne’e mak nia dehan, sira desidi atu tau joven ida hamutuk ho dira idade ne’e ida mak komanda iha unidade ida ka komponente ida. 

“Oras ne’e ita tau ona joven sira hamutuk ho katuas balun mak komanda iha komponente apoia Servisu, trestre, Centru Treinamentu Metinaru maibe iha komponente Naval veteranu deit mak komanda iha ne’eba,” dehan Lere. 

Tuir planu, tinan oin atu halo re-estruturasaun F-FDTL nian laran atu intrega ba jerasaun foun atu lidera instituisaun, nune’e veteranu nee husu ba ofisiais sira atu prepara an didiak hodi bele lidera nia soldadu sira. 

 Maibe nia dehan, atu sai lideransa superior sira sei halo avaliasaun ba sira, avaliasaun ne’e la haree ba nia matenek maibe haree liu ba ninia hahalok, nia bele duni atu sai lideransa ka lae. 

Tuir observasaun Diario ne’e katak, kuaze instituisaun iha TL mesak veteranus mak lidera, mak hanesan Prezidenti Republika, Primeiru Ministru, Instituisaun F-FDTL no Instituisaun sira seluk. 

,