Kazu CMATS; “Lideransa Australia Diferensa Ideia”

.

Jornal Nacional Diario - Tersa-feira, 16 Julhu 2013 

Primeiru Ministru (PM) Kay Rala Xanana Gusmao informa katak, Primeiru Ministru dadaun ne’e Kevin Rudd ho Primeiru Ministru anterior Australia Julia Gillard iha diferensa ideia ka hanoin kona ba kazu Certain Maritime Agreement Timor Sea (CMATS). 

 “Primeiru Ministru Australia foun ne’e Kevin Rudd foin mak tama, ne’e mak nia koalia la tuir saida mak governu anterior koalia tiha ona, lolos ne’e Kevin Rudd husu ba governu anterior ne’e atu bele esplika ba nia kona-ba kazu ida ne’e,” Hateten Xanana Gusmao iha Akademia PNTL Comoro, Dili, Segunda (15/7). 

Xanana husu ba Kevin Rudd atu bele responde TL ne’e ho objetividade oituan, sela’e negosiasaun ne’e lao oin seluk, koalia fali oin seluk. “Kazu CMATS Australia responde tiha ona katak, sira aseita atu ba Tribunal arbitrazen, ne’e mak ami prepara hela hodi ba ida ne’e,” Xanana afirma. 

PM Xanana Gusmao hatutan, foin dadauk Prezidenti da Republika Taur Matan Ruak ho Primeiru Ministru Australia Kevin Rudd mos koalia ona atu governu rua ne’e halo negosiasaun kona ba kazu ida ne’e. 

 “Hau kumpriende tamba Kevin Rudd foin mak tama, mas ho Primeiru Ministru anterior Julia Gillard, hau husu beibeik atu negosia atu buat ne’e labele sai boot, maibe sira dehan ami hili arbitrazen,” dehan Xanana. 

Tanba katak Xanana, problema ne’e laos husi Governu TL, TL fo ona opsaun ba sira atu labele haboot kazu ida ne’e, maibe sira ulun to’os nafatin, entaun tenki bad uni tribunal arbitrazen. 

Xefi do Governu dehan tan katak, nia la hakfodak ho ameasa sira hanesan ne’e, nia sei hakilar iha Tribunal arbitrazen hodi defende soberania TL nian, tanba Australia nia direitu ba CMATS ne’e la boot liu TL nian. 

Primeiru Ministru Kay Rala Xanana Gusmao optimista katak, TL sei manan Conocophilips iha Tribunal arbitrazen Europa, tanba tuir direitu internasional iha kontratu ne’e, Australia uza espionazen ne’ebe ladiak hodi hanesan TL. 

Tanba ne’e dehan Xanana, Governu TL ho Governu Australia agora dadauk ne’e preparadu atu ba Tribunal arbitrazen. “Timor Leste atu beik no lahatene sura to’o iha ne’ebe, atu kiak no hamlaha to’o iha ne’ebe, Governu Timor-Leste sei la hakfodak,” Xanana fundamenta. 

.