“Governu Tenke Blacklist Kompania Abandona Projetu”

.

Jornal Independente - Tersa-feira, 09 Julho 2013 

Membru Parlamentu Nasional (PN) husu ba azensia dezenvolvimentu Nasional (ADN), Ministeriu Obras Publiku (MOP) no aprovizionamentu Nasional atu labele ‘garganta’ deit, maibe, tenke tau iha pratika kona ba blacklist kompania ne’ebe inkapasidade. 

Deputadu Bancada CNRT, Cesar Valentine ‘Pilotu’ hateten, atetude kompania sira hodi abandona projeitu no halo projeitu laiha kualidade fo impaktu boot ba Orsamentu Jeral Estadu (OJE), tanba hasai osan lubuk ida maibe la benefisiu povu iha nasaun ne’e. 

Nia fo ezemplu, iha Suku Matata, Sub-Distritu railako, Distritu Ermera, kompania ida kaer obra seidauk hotu nia husik hela hodi kaer fali projeitu seluk hanesan harii lina eletrsidaide. 

“Tamba saida mak kompania ida aat mos ita boot (aprovizionamentu) fo projeitu hela de’it ne’e maun, alin, primu, ka oan sarani,” dehan nia iha uma dukun PN, (8/7). 

Iha fatin hanesan Prezidenti Komisaun E PN, asuntu Infraestrutura, Pedro da Costa Martires hateten, Komisaun E PN identifika ona kompania sira ne’ebe inkapasidade, ne’e duni, sei kordena ho MOP atu haree problema ne’e. 

“Ami kordena ona ho MOP katak, agora dadaun sira implementa ona pra-kualifikasaun atu haree loloos empreza ida ne’e iha kbiit duni atu kaer obra ida,” dehan nia. 

Kona-ba empreja abandona projeitu, nia dehan, sei la fo tan projeitu governu no rejista kompania ne’e la halo tuir kontratu inklui BOQ sei hetan obra. 

 Komisaun E rekonese iha frakeiza, liuliu iha rekursu umanu no mentalidade ne’ebe presiza hadia liu husi orsamentu estadu. 

 “Presiza aprende mentalidade atu hatene obra governu laos ema id ania, maibe ita hotu-hotu nia atu rezolve tuir ita hotu nia hakarak,” tenik nia. 

 Antes ne’e, Ministru Obras Publiku (MOP), Gastao Sousa hateten, pra-kualifikasaun ba emprezariu sira sei realiza iha fulan ne’e hodi hatene kapasidade emprezariu sira bainhira kaer obra. 

.