“Governu Taka Artemarseais”

.

Jornal Nacional Diario - Segunda-feira, 08 Julho 2013 

Primeiru Ministru Kay Rala Xanana Gusmao sublina katak, dadaun ne’e Governu hasai ona rezolusaun ida atu taka permanente grupu artemarisias, tanba elementus balun artemarsiais kontinua involve iha krime. 

“Iha tinan 10 ona hamuas malu, maibe hare ba pior liu ona, hau haruka taka permanente kedas, tanba demais liu ona, ita ba jura fali iha bandeira Merah Putih nia oin, hodi mai estraga malu fali,” afirma PM Xanana Gusmao, ba Jornalista sira iha edifisiu Komisaun Anti Korpsaun (KAK) Farol, Dili, Sesta (05/7), hafoin entrega dokumentus implementasaun projeitus fizikus balun ba KAK. Xanana hatutan katak, durante ne’e Governu husik hela hahalok aat sira ne’e, maibe agora ne’e Governu la tolera ona, tanba taha malu no oho malu iha fatin-fatin. 

“Iha rezolusaun ne’ebe mak ami hasai mos, ba PNTL no F-FDTL ne’ebe mos oituan-oituan ajuda buat sira ne’e atu nunka mais sai diak, tanba membru balun partenese no membru balun partense husi ida, entaun iha rezolusaun ne’e mos ami hateten katak, karik mak membru ida terlibat ka nia sadere oituan, hasai kedas husi F-FDTL no PNTL,” esplika Xanana. 

Xefi Governu ne’e esplika, Governu taka artemarsiais ne’e atu ejiji, liu-liu ba responsavel artemarsiais, tanba hanoin ona oinsa mak atu hadomi malu. 

Xanana mo lembra katak, tinan barak dezde nia sei Prezidenti, hamaus malu hela de’it, to’o tinan kotuk foin dadauk ne’e, sira (artemarisias-red), hemu ran, hemu fahi ran, manu ran no mama malus hodi jura ba buat hotu, maibe liu tiha, sai fali husi jalan tikus ba iha Indonesia hodi halo graduasaun ka juramentu ba Bandeira Merah Putih. 

“Iha rezolusaun ne’ebe ami hasai, ami konsidera katak, ita Timoroan sira susar, familia ka maun ida husi grupu ida, alin husi grupu ida komesa fahe ona, ida ne’e ita lakon tiha kedas ona ita nia kultura respeita malu,” Xanana afirma. Xanana mos koalia katak, durante ne’e Komisaun Regulador Arte Marsiais (KRAM) halo investigasaun ba droga ne’ebe tama mai TL, hodi labele estraga futuru joven sira nian, maibe artemarsiais mak atu provoka liu fali situasaun. 

“Tanba ida ne’e mak governu taka, tanba husu beibeik ona ba sira atu labele halo hanesan ne’e, maibe kontinua nafatin, ho ida ne’e mak Governu taka ona, laiha tan ona, atu se-se deit,” Xanana esklarese. 

Xefi Governu ne’e dehan tan, Governu la premiti tan joven sira ne’ebe la rona ona, hodi ta’a malu no estraga malu. 

 “Hanesan artemarsiais ida ne’e ba ta’a malu fali iha Indonezia hodi hamoe Estado no povu ida ne’e nia naran,” xanana esplika. 

 Tanba dehan xanana, ho buat sira ne’e hotu maka rezolusaun ne’e Governu hasai tiha ona, maske seidauk publika maibe la permiti tan sira ona. 

Tuir Xanana, problema ida ne’ebe la iha liu ona ninia substansia ho artemarsial, mak hanesan Taekwondo no sira seluk, ne’ebe ba iha rai seluk lori nasaun nia naran, maske la manan medailla mos mai fali halo estadu no povu kontente.

.