Estadu La Tolera Polisia Indisplinadu “Rekolha Ona Kilat Balun Lakon”

,

Jornal Nacional Diario - Kinta-feira, 18 Julhu 2013 

Estadu no Governu Timor-Leste lakohi tan ona tolera membru polisia Nasional Timor Leste (PNTL) ne’ebe la displina no involve an iha atividade artemarsiais. 

 Sekretariu Estadu Segudarnsa (SES), Francisco da Costa Guterres, afirma katak, Governu kontinua ejiji no alerta ba Komando PNTL atu mantein displina hodi asegura lei ho orden, nunee, bele fo garantia ba povu Timor atu moris livre no hakmatek. 

 “EStadu ejiji nafatin ba Komando PNTL atu proteza povu hodi la bele mate tan, ita la admiti, ema seluk impede fali ema seluk nia liberdade sirkulasaun, ita lakohi ema sa’e motor pois balun lori fali samurai ta’a ema nia kotuk laran, tanba ne’e, Polisia tenke forte no displina,” afirma SES Francisco Guterres, hodi responde Jornalista sira iha Hotel Timor, Kuarta (17/7). 

Buat ne’ebe Primeiru Ministru (PM) Kay Rala Xanana Gusmao, alerta dehan, membru PNTL balun envolve artemarsiais no la hatudu imparsialidade iha atuasaun, tuir Framcisco Guterres katak, situasuan ne’e hatudu realidade duni, tanba ne’e governu tau regra forte hodi hametin membru PNTL sira nia obidensia ba lei no orden, nune’e bele hala’o serviso ho rigor, ho laran, no respeita orden hirarkia. 

“Governu lahalimar tan ona ho membru PNTL ne’ebe indisplina no la respeita ba orden nia okos, ami tenki hametin polisia para fo seguransa diak ba povu,” hateten Francisco Guterres. 

 Kona ba kilat PNTL ne’ebe lakon dezde krizi 2006-2007 nian no seidauk rekollha to’o ohin loron hodi lori mos rizku boot estabilidade no seguransa, SES Francisco Guterres sublinha katak, iha ona investigasaun no kilat lubun boot mak rekolla tiha ona. 

“Ita lalika preokupa, tanba ami rekolha ona lubun boot balun no ekipa ida la’o nafatin hodi buka kilat sira ne’ebe lakon,” informa Francisco Guterres. Francisco Guterres la teme kilat lolon hira mak rekolha ona, maibe ba membru PNTL hirak ne’ebe mak halo lakon kilat ne’e iha hela prosesu laran. 

“Balun la sala ami perdua, mas balun ne’ebe lakon no la rekonhese nia sala no asosia ba krimi, mak tenke lori ba Tribunal,” afirma Francisco Guterres, hodi informa mos katak, atu halo kontrolu diak liu ba armas PNTL nian, mak Governu liu husi SES halo ona regulamentu forte ida ba kontrolu de armas.

,