“Deskonfia Nepotizmu Mosu Iha ME Ba Legalizasaun Diploma”

.

Jornal Independente - Segunda-feira, 08 Julho 2013 

Ministeriu Edukasaun (ME), liu husi Diresaun Nasional Ensinu Superior (DNESU), deskonfia hamosu nepotismu ba legalizasaun diploma Alumni Universidade Nasional Timor Leste (UNTL), tanba estudante ne’ebe simu graduadu iha loron 2 fulna Maiu tinan 2012 seidauk halo legalizasaun ba diploma, maibe familia servisu iha ME bele halo legalizasaun lalais. 

Graduasaun UNTL, husi Departementu Siensia Govermentais, Eugenio Lopes Aravei, hatete, graduadu UNTL hamutuk 107 resin ne’ebe simu graduasaun iha loron 2 fulan-Maiu tinan 2013, husi Fakuldade lima (5) seidauk hetan legalizasaun husi ME. 

“ME halo mal administrasaun, tanba ami sira ne’ebe mak familia laiha ne’e sai vitima no seidauk hetan legalizasaun to’o agora, maibe ami nia kolega balun ne’ebe sira nia familia servisu iha laran hetan ona legalizasaun,” hateten Eugenio Lopes Aravei, Sesta (5/7), iha Palapasu, Dili. 

Nia mos hatutan katak, mal-administrasuan ne’e mosu tanba UNTL rasik la halo lina kordenasaun diak ho ME hodi halo legalizasaun la tuir prosesu ne’ebe mak legal. 

Nia hatutan, tuir lolos Universidade rasik mak halo legalizasaun ba diploma, tanba Universidade rasik hetan ona akreditasaun husi Governu liu hudi ME, la presiza legaliza Diploma husi ME, Agora Politika ME mos ketak, Universidade mos ketak. 

Nia hatutan tan katak, wainhira sira ba ME atu halo legalizasaun iha ME liu husi Diretor ensino Superior dehan depois mak legaliza maibe hein to’o ohin loron seiduak hetan legalizasaun. 

Iha fatin lahanesan membru Parlamentu Nasional Komisaun F, ne’ebe trata asuntu Edukasaun no Saude Virgilio Ornai hatete, husu ba ME ho Universidade kordena lalais atu nune’e bele solusiona problema hirak ne’e. 

“Departementu sira ne’ebe hamosu problema iha Universitariu, tenke ser hetan lisensa husi ME, atu hetan rekonesementu ne’e para sira koalia iha Fakuldade ne’e no sir abele hetan legalizasaun sira nia diploma,” dehan Deputadu Ornai. 

Nune’e, Jornalista tenta atu konfirma ho Vice Ministru Ensino Superior no Diretor Nasional Ensino Superior (DNSU), maibe Diretor ne’e sei hela iha Malang, Indonesia, tamba ne’e mak seidauk hetan konfirmasaun klaru husi parte ME nian.

,