“Xefi Suku Kobra Osan Idozus Iha Leotela”

.

Jornal Independente - Kuarta-Feira, 12 Junho 2013 

 Xefe Suku Leotela, Sub Distritu Likisa vila, Distritu Likisa kobra osan ba idozus (ferik-katuas) sira ne’ebe seidauk kompleta dokumentus atu simu osan. Idozus sira ne’e tenki fo osan U$1 ka 2 dolar Amerikana ba xefi suku hodi ba hadia fali sira nia dokumentus iha Distritu Likisa Vila. 

 “Hau haruka hau nia beoan sira ba haree naran iha sede suku, maibe xefe suku dehan, se mak hakarak haloos dokumentus ne’ebe seidauk loos, bele fo U$2 dollar ka U$1 dollar, se lae imi ba halo rasik iha Likisa Vila,” informa Avo Florentina Gusmao iha suku Leotela, Aldeia Hatumasse ba INDEPENDENTE liu husi via telefone (11/6). 

Ferik Florentina ne’e hatutan, kobransa ne’e hala’o hafoin Ministeriu Solidaridade Sosial (MSS) taka lista idozu sira iha sede suku Leotela. MSS mos aviza kedas idozu ne’ebe mak dokumentus seidauk loos tenke halo reklamasaun ba pontu fokal Distritu molok loron tolu nolu. 

Florentina dehan tan, xefe suku ne’e semre kobra osan deit molok ferik katuas sira simu osan. Entertantu, Xefe Suku Leotela Antonio dos santos rekonese rekoila duni osan U$1 ba idozu hodi fasilita sira lori dokumentus ba pontu fokal distrital iha Likisa Vila. 

“Ami rekoila sira nia kartaun eleitoral no osan U$1 dolar deit, atu nune’e bele fasilita ami ba kapital Distritu hodi intrega sira nia dokumentu ba pontu vokal Distrital,” dehan nia. Iha sorin seluk mos, Avo Laurentino mos preokupa ho kobransa ne’e, tanba nia simu osan husi Governu dala haat ona, maibe xefi suku sira sempre husu osan. 

 Nune’e mos, Manuela husi Aldeia Hatumasse deklara, antes ne’e sira fo osan ba xefe suku bainhira remata pagamentu iha Administrasaun Likisa Vila. 

“Ami kuandu simu ona osan, sira dehan mai ami katak, se mak la fo osan, tinan sleuk dokumentus la los ami sei la halo, neebe ami ba cek naran iha sede suku, xefe suku sira husu baa mi katak, kada benefisariu tenki selu U$2 dollar, se lae ami la halo loos imi nia dokumentus,” esplika Manuela.

.