Xanana-Taur Hala’o Inkontru: “Eziji Membru Governu Hakaas-an”

.

Jornal Independente - Sesta-Feira, 14 Junho 2013 

Primeiru Ministru (PM) Kay Rala Xanana Gusmao hala’o sorumutu ho Prezidenti Taur Matan Ruak atu hakaas-an, nune’e responde boa-vontade rai sira husi internasional atu dezenvolve nasaun Timor-Leste. 

 Xefi Governu informa nia vizita iha rai liur ba PR Taur Matan Ruak sobre akordu Memorandum of Understanding (MoU) ne’e mak asina ho Singapura no mos Filipina, tanba problema Timor Leste sempre infrenta mak asina tiha la book an atu implementa, nune’e labele lakon konfiansa. 

“Hau eziji ba membru Governu para hakaas an nafatin para responde boa-vontade husi rai sira seluk ne’ebe maka hakarak ajuda dezenvolvimentu ita nia rai,” PM Xanana dehan ba jornalista sira iha palasiu Prezidensial Nicolao Lobaro Bairu-Pite hafoin hasoru Xefe Estadu, Kinta (13/6). 

Tuir PM Xanana, nasaun Singapura no Filipina iha komitmentu diak atu ajuda TL iha area barak, nune’e maka Timor-oan rasik mak hatudu nia vontade diak para hala’o serviso. 

Tanba iha vizita foin lalais ho membru V Governu Konstitusional ba nasaun singapura no Filipina, nasaun rua ne’e inklui nasaun membru ASEAN tomak iha vontade diak atu suprota Timor nia adezaun ho dezenvolvimentu. 

Iha biban ne’e, Xefe Governu mos informa pakote fiskal, tanba ne’e xefe estadu fo hanoin ba xefe governu atu tau atensaun ba area edukasaun. 

“Prezidenti husu para anu fiskal mai tau atensaun ba edukasaun,” PM Xanana hatutna. Ho nita de entendementu ne’ebe mak V Governu konstitusional asina ho nasaun sira iha rai liur, atu implementa ho diak, Xefi estadu fo hanoin ba governu para hadia problema portu, aeroportu, estrada no postu integradu iha rai ketan. 

Aleinde ne’e, Xefe Governu ho Xefe Estadu diskute mos komisaun verdade no amizade iha Bali, ne’ebe foin lalais komisariu sira prepara hela relatoriu. 

Entertantu, deputadu sira iha uma fukun Parlamentu nasional preokupa tebes ho kapasidade membru governu ba ezekusaun orsamentu jeral do estadu ne’ebe fulan 6 ona maibe foin ezekuta pursentu 15. 

“Ami aprova osan ne’e uluk sira mai iha parlamentu hodi ida-idak nia programa, ami komisaun husi area tematika ida-idak durante ne’e halo fiskalizasaun detekta duni iha buat barak husi Ministeriu ka Sekretariu estadu barak seidauk implementa,” Agustinho Lay husi Bancada CNRT ba Timor Post iha PN, Kinta (13/6). 

Tuir deputadu sira nia fiskalizasaun nota katak, durante fulan hirak nia laran, governu sira la dun fo atensaun ba prosesu ezekusaun OJE ba programa ne’ebe aprovadu, maibe halo fali buat ne’ebe la relevante. 

Tuir nia, failansu hirak ne’e akontese tanba inkapasidade kontrolu, no lina kordenasaun fraku tebe-tebes, hanesan projeitu tinan uluk nia to’o agora barak mak sei abandona. 

Nia haktuir tan, Parlamentu nia kna’ar atu fiskaliza no halo desizaun politika ba programa governu nian ne’ebe la loos no loos, maibe durante ne’e kontrariu fali ho governante sira nia la hanesan, tanba ne’e mak programa ne’ebe implementa povu seidauk senti nia benefisiu. 

Entertantu, rezultadu fiskalizasaun husi ONG Luta Hamutuk (LH) ba prosesu ezekusaun OJE 2013 identifika, to’o ona iha tinan klaran 2013, governu foin ezekuta orsamentu ho montante miliaun U$239,8 (15%).

,