“Vise Ministra Saude Diskrimina Media Imprime”

.

Jornal Independente - Kuarta-Feira, 12 Junho 2013

Vise Ministra saude (MS), Natalia de Araujo halo diskriminasaun boot hasoru media imprime sira iha Timor-Leste, tanba lakohi fo intervista ba jornalista sira husi jornal, maibe hakarak deit nia oin sai iha televizaun no radiu.

“Hau lakohi halo entervista ho media jornal sira, hau hakarak deit mak ho radiu no Televizaun Timor-Leste, tanba jornal sira dala barak hakerek notisia inventa fali,” dehan nia iha Ospital nasional Guido Valadares (ONGV), (11/6).

Maski nune’e, Jornalista sira tenta nafatin husu katak, tanba saida mak lakohi jornalista sira intervista, maibe nia fo razaun katak, tanba jornalista sira dala barak inventa lia fuan.

Nune’e, Jornalista sira kontinua husu katak, jornal ne’ebe mak invent alia fuan?

Maibe, nia la kohi hatan no hodi hateke tun sa’e no hatete, jornalista jornal sira presiza intervista liu husi ninia protokolu.

“Jornalista husi media seluk hau lakohi fo intervista, se ita boot sira hakarak intervista tenki liu husi hau nia protokolu, hau hakarak mak TRRTl deit,” dehan Vise Ministra saude asuntu Etika no prestasaun servisu ne’e.

Ba kestaun ne’e, Sekretariu Jeral Timor-Leste Press Club (TLPC), Jose Sarito Amaral, rejeita total deklarasaun husi Vice Ministra saude no konsidera halo diskriminasaun boot hasoru servisu josrnalizmu sira.

Tuir nia, Vice Ministra saude jeneraliza situasaun hotu-hotu katak, media impremi sira dala barak inventa ema nia lia fuan, tanba, laos jornal hotu-hotu hakerek inventa ema nia liafuan.

“Labele koalia deit, maibe tenke hatudu provas, jornal ne’ebe mak durante ne’e inventa ema nia liafuan,” dehan Sarito.

Nune’e, tuir regra jornalizmu nian, fotes hotu-hotu inklui Vice Ministra sente katak, Jornalista jornal sira hakerek nia deklarasaun sala bele husu atu halo klarifikasaun, la’os halo akuzasaun arbiru tuir ida-idak nia gsotu deit.

.