“UPF Halo Transaksaun Ilegal Iha ‘Kuartu Laran”

.

Jornal Independente - Tersa-Feira, 11 Junho 2013 

Fronteira terestre entre Timor-Leste ho Indonezia sai nuudar kampo negosio ne’ebe bele fo benefisiu boot ba ema sira ne’ebe mak hela besik iha area ne’e, tanba, ekonomikamente Timor Leste sei depende ba sasan Indonezia. 

Maibe, vida negosiu ne’ebe durante ne’e halao iha fatin ne’e laos hotu-hotu lao moos, tanba negosiasaun illegal barak mak mosu iha fatin ne’e, ironi liu tan, komunidade sira haree katak, iha membru Polisia balun ne’ebe proteje hela transsaksaun illegal hirak ne’e. 

Tuir informasaun ne’ebe Diario ne’e hetan husi komunidade sira katak, oknum membru Polisia Nasional Timor Leste (PNTL) husi Unidade Polisia Fronteira (UPF) rasik mak halo transaksaun iha ‘kuartu laran’ hodi envolve direta negosiasaun laran. 

 Antonio dos Santos, komunidade batugade hateten, dala barak ona sira hetan membru UPF sira ne’e m ak proteje ema ne’ebe laiha dokumentu tama sai lina fronteira ho livre. 

“Ami la kumpriende tamba saida mak ita nia Polisia UPF sira ne’e hatama fali ema illegal mai TL,” dehan nia iha batugade foin lalais ne’e. Iha fatin hanesan, Armindo Neto hateten, servisu UPF nian ne’e atu asegura area Timor Leste nian para ema illegal la bele tama, maibe sira (UPF) rasik mak hatama fali ema illegal sira ne’e mai TL. 

“Hau la hatene, ne’e keta sira nia familia ruma ka nusa,” tenik nia. 

Responde ba kestaun ne’e, Adjunto komandante PNTL, Komisariu Afonso de Jesus hateten, UPF ne’e halo kna’ar tuir lei, maibe kuandu komunidade sira hetan member balun asegura ema illegal mai Timor-leste, tenki hatama keixa ba komandu. 

Husi keixa ne’ebe mak komunidade sira hatama ne’e para komandu PNTL be;e foti medida liu husi prosesu investigasaun. 

“Ami labele kodena deit elementu ida ne’ebe laiha keixa, laiha evidensia, tanba iha kodigu prosesu penal hateten, se iha problema hanesan ne’e hato’o keixa,” dehan nia iha Kuartel Jeral PNTL, Kaikoli, Dili (10/6). 

Afonso esplika liu tan katak, koordenasaun entre Tentara Nasional Indonesia (TNI) ho UPF halo ho efetivu, tamba, kada fulan iha enkontru regular hodi koalia kona-ba seguransa Fronteira. 

Diariu ne’e tenta atu halo konfirmasaun ba komandante UPF, maibe nia la iha tempu tanba sei asiste eventu kurida kavalu. 

.