“Universidade TL Seidauk Bele Loke Maestradu”

.

Jornal Timor Post - Sesta-Feira, 07 Junho 2013 

Parlamentu Nasional (PN) liu husi komisaun F ne’ebe trata asuntu Saude, Edukasaun, veteranus no Igualidade jeneru, konsidera Universidade iha Timor-Leste durante tinan 13 nia laran seidauk iha kondisaun rekursu umanu ne’ebe diak atu bele loke postu maestradu. 

 “Hau hanoin atu foti Maestradu iha ne’e seidauk bele, tanba ita Timor ne’e iha Profesor Doutor (Prof. Dr-red) hira mak iha ne’e, agora transfere husi Indonesia, maibe lian ne’ebe introdus iha prosesu aprendizazen maka Portugues ho Tetum, agora dosente ita transfere husi Indonesia ne’e problema mos ba transferensia material,” Prezidenti Komisaun F Virgilio Hornai ba Jornalista sira iha PN, Kuarta (06/6). 

Tuir Deputadu Husi bancada Partidu Demokratiku (PD) ne’e katak, universidade ne’ebe hatn ona akreditasaun bele ona loke postu maestradu, maibe haree mos rekursu ne’ebe iha hanesan Profesor Doutor, labele haree deit ba akreditasaun atu nune’e kualidade bele diak iha futuru. 

“Universidade sira ne’ebe hakark loke postu maestradu ne’e ninia rekursu umanus iha hanesan professor doutor, agora maestradu ho maestradu mak hanorin malu ne’e la loos,” Virgilio Hornai dehan. 

Nia haktuir, iha Universidade privadu sira durante ne’e eziste seidauk hetan akreditasaun, maibe prosesu ensino ba postu maestradu ne’e lao hela. 

“UNiversidade ne’ebe seidauk hetan akreditasaun, maibe sira loke ona postu maestradu ne’e, hau hanoin problema ne’ebe presiza haree didiak,” Virgilio sublinha. 

Nia husu ba estudante sira ne’ebe tama iha Universidade no institutu ida bele haree didiak hafoin bele desidi atu tama ba iha Universidade ne’ebe iha kualidade atu estuda ba. 

,