Tratamentu Lucia Ba Estranjeiru “Resposta La Klaru”

.

Jornal Timor Post - Sesta-Feira, 07 Junho 2013 

Hospital Nasional Guido Valadares (HNGV) fo ona resposta ba karta notifikasaun ne’ebe manda husi Tribunal Distritu Dili (TDD) hodi husu esplikasaun doutor sira nia katak, HNGV iha kondisaun atu bele halo operasaun ba kondenada Lucia Lobatu nia moras ka lae. 

Jose Pedro Camoes nu’udar kondenada Lucia Lobato nia advogadu haktuir resposta husi HNGV hateten deit katak, resposta HNGV hanesan ho buat ne’ebe junta ona iha rekerementu doutor sira nian hamutuk ho pedidu ne’ebe advogadu sira haruka ba Tribunal. Kona-ba moras kankru ne’ebe Lucia sofre nanis ona, nia dehan, presiza tratamentu kontinuasaun maka bele detekta katak, nia moras ne’e grave duni ka lae?,

Maibe HNGV la esplika klaru katak tratamentu kontinuasaun ba moras kankru ne’e atu hala’o iha TL ka singapura. 

“Doutor sira iha HNGV dehan presiza tratamentu kontinuasaun maka bele detekta katak, moras ne’e grave ka lae, maibe sira la esplika ba Tribunal katak moras ne’e atu halo tratamentu iha TL ka Singapura,” Camoes dehan ba Jornalista, kinta (06/06) iha Tribunal Distrital Dili. 

 Camoes dehan, relasiona ba karta resposta ne’ebe la klaru, kuarta (5/6) horseik Tribunal Distrital Dili haruka fila fali karta notifikasaun HNGV atu husu esplikasaun klaru katak moras kankru ne’e bele halo tratamentu iha Timor Leste ka la’e, no fasilidade operasaun iha HNGV sufisiente ka lae atu halo operasaun ba moras ne’ebe Lucia Lobato infrenta. 

Nia hatutan, karik HNGV resposta katak iha fasilidade sufisiente atu halo operasaun konserteza sira nia pedidu ba Tribunal ne’e la vale, no tenki trata deit saude iha Timor Leste, tanba doutor sira rekonese fasilidade kompletu. 

.