Taur Orgullu, “Xanana-Alkatiri Servisu Hamutuk”

,

Jornal Timor Post - Segunda-Feira, 10 Junho 2013 

Prezidenti Republika (PR) Taur Matan Ruak kontenti, bainhira haree Primeiru Ministru Xanana Gusmao no eis Primeiru Ministru Mari Alkatiri servisu hamutuk hodi dezenvolve Timor Leste, maske figura nain rua ne’e mai husi partidu ne’ebe la hanesan. 

 Prezidenti Republika espera, sentimentu hirak ne’e bainhira halo dialogu kona ba paz ho komunidade sira iha suku Komoro, Distritu, Dili, sabadu (8/6). 

Xefi Estadu hateten, wainhira husik hela instituisaun forsa defeza atu mai kandidatu an ba Prezidenti Republika, ho objetivu hakarak halibur hamutuk lider tomak iha nasaun ida ne’e hodi kontribiui ba dezenvolvimentu nasaun ida ne’e. 

“Hau mai objetivu hakarak kontribui, ida mak hakarak halibur ita nia lider sira ne’ebe uluk hamriik iha oin halibur ita Timoroan sira, fo hanoin, fo kbiit, fo hanoin laran diak atu ita hotu hadomi ita nia nasaun,” hateten PR Taur iha ninia diskursu iha eskola 30 de Agusto, Komoro. 

Nia dehan, tanba mai depois de ukun an, ema barak organiza an iha partidu, dala ruma haree malu hanesan fali inimigu, maibe haree partidu la presiza haree malu hanesan inimigu, harii partidu atu haburas demokrasia iha ita nia rain rasik. 

 Tanba ne’e, Xefe Estadu husu ba sira nain rua (Alkatiri-Xanana) atu lalika implementa deit iha politika sira nia leet, maibe tenki lori to’o suku no aldeia sira no lori to’o familia, no enkoraja mos joven sira atu prepara an hodi simu responsablidade nasaun nian atu lori ba oin. 

 “Se deit mak atu ukun nia labele hanoin deit nia an, maibe tenki hanoin sira ne’ebe kiak, ne’ebe terus hodi fo kontribuisaun ba nasaun ne’e, ita nia independencia la monu husi lalehan, lori ita nia terus no sofremento maka ita hetan, familia hira mak la mate, familia hira mak la sofre, familia hira mak la fahe malu, tanba ukun an ida ne’e,” dehan nia. 

 Ho ezemplu hirak ne’e, husu ba inan aman sira atu kontinua involve oan sira iha dezenvolvimentu rai ida ne’e nian, nasaun nia futuru defende ba ita hotu nia oan, oan sira nia futuru iha ligasaun ho nasaun nia futuru, kuandu nasaun lao ba oin, nia futuru mos lao ba oin. 

.