“Taur Moe Animal La’o Livre”

.

Jornal Timor Post - Sesta-Feira, 07 Junho 2013 

Prezidenti Republika (PR) Taur Matan Ruak sente moe tebes ho hahalok komunidade sira iha kapital Dili nebe mak husik animal la’o arbiru iha sidade laran. 

“Hau moe tebes wainhira iha malae ida hateten katak, Povu Timor Leste husik animal arbiru maibe halo fali luan ba aihoris no aifuan sira hanesan aifarina, feuk no seluk tan,” hateten Taur wainhira halao dialogu ho komunidade sira iha becora Dili (06/6). 

Nia hatutan, problema ne’ebe mak halo xefe estadu preokupadu no senti komiku no hamoe tebes, wainhira komunidade internasional ida hase katak, povu Timor Leste nia ulun mamar tamba bele sulan ai-han no aifuan sira, maibe haluha tiha-an katak, animal sira husik livre fali. 

 Tamba ne’e xefe estadu husu ba komunidade sira atu kontribui no iha konsensia katak, moris iha kapital nasaun ida presija iha hanoin ida luan hodi kontribui ba sidade mos. Tuir observasaun durante ne’e animal ne’ebe mak komunidade sira husik livre liu husi kapital Dili mak hanesan, fahi, asu, manu no bibi. 

“Ita kuandu ba ema nia rain ita hare ema nia sidade ita moe fali, no ita hateke katak waooooo!!!!, maibe ita nia rasik fo orguilho fo fali pontu la diak no imazen la serve nian,” Xefe Estadu dehan. 

 Iha dialogu ne’e hetan partisipasaun husi komunidade sira iha becora husi labarik kiik, joven, katuas no ferik. 

Foto de : Presidencia da Republica de Timor Leste

Editor Foto: Paizinho Tilman
Fotógrafo: Abick Carceres — at Suko Becora, Sub-distrito Cristo Rei, Distrito Dili 

.