“Taur ‘Mehi’ Sai Primeiru Ministru”

.

Jornal Timor Post - Tersa-Feira, 11 Junho 2013 

Prezidenti Republika Taur Matan Ruak iha ona mehi ida hodi hakat tuir pasu atual Primeiru Ministru (PM), Xanana Gusmao ne’ebe agora lidera V Governu Konstitusional. 

Iha dialogu Xefe Estadu nian durante loron tolu iha Suku Becora, Bairo-Pite no Komoro sempre fo deklarasaun ho komiku hodi fo hanoin ba partisipantes sira kona ba nia hanoin ba futuru. 

Tanba, tuir esperensia eis komandante guereleiru, Xanana Gusmao antes ne’e assume mos pasta nu’udar Prezidenti Republika iha tinan 2002 to’o 2007 no kontinua harii partidu nune’e, sai Primeiru Ministru ne’ebe mak hetan konfiansa hodi assume pasta xefe Governu durante periodu rua, komesa husi 2007-2012. 

“Agora hau hakarak hateten ita nia maun Xanana, uluk Prezidenti Republika depois agora sai Primeiru Ministru, hau mos hakarak lao tuir dalan ida ne’e (sai PM-red), maibe konforme deit imi hotu (Povu sira-red), maibe hau hakarak hatete halimar deit ba imi tomak maibe maka ne’e, ita hakarak hadia ita nia rai ida ne’e mos povu nia moris,” PR Taur hateten durante dialogu ho komunidade sira iha becora, Kinta (6/6). 

Maibe, tuir eis major jeneral forsa Militar ne’e afirma katak, servisu nuudar ezekutivu laos fasil tebes tanba servisu barak ne’ebe mak presiza halo hodi dezenvolve nasaun Timor Leste. 

“Agora hau hatene ona iha tinan lima mai, imi sei la hili ona hau, tanba ne’e, agora hau tenke hakaas kedas imi hotu para servisu maka’as hodi hadiak ekonomia familia ida-idak ninia dezenvolvimentu ekonomia Timor-Leste,” Taur dehan. 

PR Taur mos husu ba komunidade hotu atu hametin paz no estabildiade iha ida-idak nia bairo, tamba dezenvolvimentu atu la’o diak presiza ema hotu nia kontribuisaun ho dame no domin.

Foto de, Presidencia da Republica de Timor Leste
Editor Foto: Paizinho Tilman
Fotógrafo: Abick Carceres — at Suko Becora, Sub-distrito Cristo Rei, Distrito Dili

.