“Taur, Lu-Olo Ho Mari Deskuti ASEAN”

.

Foto, Veronica Fernandes

Jornal Timor Post - Sabadu, 01 Junho 2013 

Prezidenti Republika (PR), Taur Matan Ruak, hala’o Vizita ba Prezidenti Partidu FRETILIN, Framcisco Guterres ‘Lu-Olo’ no Sekretariu Jeral, Mari Alkatiri, hodi deskute asuntu Timor Leste nia preparasaun atu intrega ba ASEAN no preparasaun asumi Prezidenti CPLP. 

“Prezidenti Republika, Taur mai iha ne’e koalia ho ami nain rua a vontade liu no vizita uma (rezidensia Farol), no pratikamente iha diskusaun mos sobre pratika nasional asuntu CPLP nian, asuntu ASEAN nian buat sira ne’e hotu, ami koalia buat sira saida mak ita servisu hamutuk atu rai ne’e bele lao ba oin,” eis Primeiru Ministru Mari Alkatiri hateten ba jornalista sira, Kinta (31/05), hafoin sorumutu iha nia rezidensia Farol-Dili. Tuir atual Sekretariu jeral Partidu FRETILIN ne’e hateten katak, inkontru refere sei kontinua ba oin esntre lideransa sira. 

“Ami sei kontinua inkontru hein Primeiru Ministru mai ami sei ba halibur fali nia fatin para atu haree buat sira ne’e hotu,” Alkatiri dehan. Nune’e mos Prezidenti Partidu FRETILIN, Framcisco Guterres ‘Lu-Olo’ akresenta liu tan katak, diskusaun refere koalia liu sobre interese nasaun no povu nia moris diak ho kontestu boot tebes. 

 “Ami deskute kestaun integrasaun Timor Leste nia ba ASEAN, naturalmente ba oin ita presija ajusta no fo tan ideias ba malu, hanesan mos CPLP ne’ebe mak hela tinan ida iha 2014 ita hola Prezidensia ba CPLP, tanba atu defini politiku ba nasaun membru CPLP tomak, purtantu idea hirak ne’e importante,” Lu-Olo dehan. 

Aliende deskute preparasaun asumi prezidenti CPLP, lideransa nain tolu ne’e mos deskute mos sobre kestaun veteranus no kombatentes ne’ebe mak to’o ohin loron aumenta ba nafatin, no seidauk iha solusaun diak. Tuir Prezidenti Partidu FRETILIN ho Sekretariu Jeral afirma katak, asuntu ASEAN no CPLP importante ba Timor Leste tomak atu partisipa ho adekuadu, nune’e hetan susesu iha futuru. 

Nune’e, iha hasoru malu ne’e, lideransa nain tolu ne’e mos dekute problema veteranus iha Timor Leste ne’ebe maka ohin loron aumenta nafatin, nune’e haree hamutuk atu bele rezolve iha tempu oin mai. 

.