Taur Husu Komunidade Kontribui ba Paz

.

.

Diariu Timor Post - Jumat, 07 Juni 2013 

DILI - Prezidenti Republika Taur Matan Ruak husu ba komunidade tomak iha suku Becora atu kontribui ba Paz hodi hadia ekonomia uma laran.

"Sidadaun nia papel importante oinsa atu istimula moris ida sai d'iak, Tanba ne'e presija iha partisipasaun ne'ebe maka adekuadu hodi muda moris ba d'iak,” dehan  prezidenti Taur wainhira hala’o diálogu ho komunidade suku Becora hodi koalia sobre partisipasaun sidadaun ba dezenvolvementu ekonomia, iha Becora (06/06).

Durante tinan 30 resin liu ba, povu tomak iha komitmentu maka’as no neon ida hakarak ukun rasik-an, maibé depois ukun-an povu sira hasoru difikuldade no problema oi-oin hanesan akontese iha krizi 2006 no problema hamlaha no kiak, rekoñese  Xefi Estadu Wainhira simu keixa barak husi komunidade sobre problema Edukasaun, Eletrisidade, Bé mós no Ekonomia.

Iha krizi 2006,  Taur hateten lideransa sira konsege ho ulun malirin hakat liu ezame boot ne’ebé doko unidade nasionál no hetan previlejiu husi komunidade internasional. Maibé kiak nunka akaba. Tanba ne’e sidadaun tomak iha dever atu labele hakiak-an rasik maibé oinsa bele uja rekursu ne’ebé iha para hadia ekonomia iha uma laran rasik.

Xefi Estadu hateten nia urgullu tanba ohin loron diferente tebes la hanesan tinan 10  kotuk liu ba, Timor-Leste simu deit husi donator sira, maibé ohin loron maski hasoru kiak, Governu fó ona apoiu ba nasaun balun hodi suporta rezolve problema sira nian hanesan São Tome Prinsipe no nasaun seluk ne’ebé antes ne’e hetan dezastre naturais.

Prezidenti Taur hateten iha tinan barak Governu  hasai osan barak maibé seidauk hatudu-an didi’ak, administrasaun no dezenvolvementu konsentra liu iha kapital. Tanba ne’e povu sira iha area izoladu no rurais kontinua senti-an katak laiha Estadu no Governu.

“Atu hamenus kiak, ita presija habelar Estadu ba fatin tomak, labele iha deit kapital, tenki halo dezentralizasaun ne’ebé di’ak nune’e sidade hanesan Díli bele iha tan rua ka tolu nune’e, povu sira mós bele buka moris abranje uitoan,” dehan Taur.

Xefi Estadu mós hateten hanesan nasaun ne’ebé riku Mina, ita labele garantia deit ba minarai no gas maibé presija dezenvolve area Agrikultura, peskas, turismu, no edukasaun para bele sustenta ekonomia ba futuru wainhira rekursu naturais maran.

Iha diálogu ne’e, komunidade sira husu ba prezidenti repúblika atu sama atensaun no fó hanoin ba Governu   sobre difikuldade ne’ebé povu infrenta hanesan be mos, eletrisidade, estrada, problema veteranus, kondisaun eskola, saúde no seluk tan.

Diálogu ne’e hetan akompaña husi Ministru Administrasaun Estatal, Jorge Teme, Vise Ministru Edukasaun, Virgilio Smith, Sekretariu Estadu Eletrisidade, Januario Perreira, Sekretariu Estadu Veteranus no Libertasaun, Julio Sarmentu ”Metamalik”, Sekretariu Estadu Meu Ambiente, Nominando Buras no Administrasaun Distritu Dili inklui liders suku. (uly)

Foto de,  Presidencia da Republica de Timor Leste

Editor Foto: Paizinho Tilman
Fotógrafo: Abick Carceres — at Suko Becora, Sub-distrito Cristo Rei, Distrito Dili

.