“Stok Aimoruk Iha Distritu Balun Mamuk”

.

Jornal Independente - Kuarta-Feira, 12 Junho 2013 

Tuir Fiskalizasaun Parlamentu Nasional hatudu katak, Stok Ai-moruk iha Distritu balun mamuk. Situasaun ne’e, deputadu parlamentu nasional husu ba Ministeriu saude atu asegura stok aimoruk nivel Distritu iha teritoriu tomak, tanba bele fo impaktu negativu ba komunidade sira iha area rural. 

Deputadu bancada partido Demokratiku (PD), Paulino Monteiro hateten, nia parte halo fiskalizasaun no monitorizasaun iha ospital Distritu Same katak, Stok aimoruk mamuk fo impaktu negativu direita ba pasiente sira. 

“Ami nia haree iha Same iha Ospital stok aimoruk laiha ne’ebe susar ba pasiente sira atu asesu aimoruk bainhira hetan moras ruma, dehan nia iha uma fukun PN (11/6). Aliende ne’e, tuir nia difikuldade ne’ebe ospital Same hasoru mos hanesan laiha kombustivel ba kareta saude. 

 “Iha ne’eba to’o agora laiha kombustivel iha osan iha invois ne’e ho total rihun $2 dolares maibe to’o agora ema simu deit $600 agora iha ospital rasik laiha gas, no buat barak mak laiha sei falta, tanba ne’e Ministeriu saude toma atensaun,” nia informa. 

Iha fatin hanesan, Deputadu FRETILIN Manuel de Castro Pereira afirma, Ministru Saude presiza duni asegura duni stok aimoruk iha kada Distritu tanba komunidade iha area rural presiza aimoruk bainhira hetan moras ruma. 

Tuir nia, durante ne’e Ministru saude la fo atensaun ba asuntu stok aimoruk maibe ba fali muda no troka doutor sira tuun sa’e deit. “Ami rona katak Ministru Sergio Lobo hasai no troka doutor sira servisu iha Hspital baucau, no troka arbiru deit, aat liu tan mak Ministru ne’e ba hasai doutor sia ba interese politiku,” tenik nia. 

.