“SPTL Konsidera ME Hamate Edukasaun TL”

.

Foto, Joãozito Viana

Notisia Husi TVTL - Kuarta-Kalan, 12 Junhu 2013 Sindikatu Profesor Timor Leste (SPTL) husu ba Ministeriu Edukasaun (ME) atu halo reforma ba Diretores balun ne’ebe lahatene halo servisu. 

Sindikatu mos husu ba Parlamentu Nasional atu haree kestaun merenda eskolar. Liu husi konferensia da imprensa Sindikatu Profesores hato’o sira nia lamentasaun kona ba servisu Ministeriu edukasaun nian ne’ebe durante V Governu konstitusional seidauk lao ho diak. Sindikatu profesores husu Ministeriu Edukasaun halo reforma ba diretores sira ne’ebe uluk hili tuir Partidu no ikus mai lahatene halo servisu tuir kargu ne’ebe sira hetan. 

 “Prestasaun servisu la diak, ne’ebe uluk IV Governu halo ne’e maka kona ba foti diretor eskola sira ne’e haree liu ba sistim partidaria, entaun iha ne’e kualidade edukasaun lao la dun diak, tamba diretor eskola sira ne’e la dumina administrasaun, sistema mos la dumina entaun diretur ida-idak halo ninia, professor sira halo ninia, estudante ida-idak halo ninia, ikus mai halo avaliasaun ba ezame nasional saida mak mosu? 

Liu-liu eskola publiku sira laiha kualidade, tamba husi Ministeriu edukasaun duni maka hakarak estraga edukasaun iha Timor Leste,” deklara sindikatu professor. 

 Problema merenda eskolar mos sai hanesan prokupasaun boot ba sira, professor sira hateten, fos ne’ebe distribui ba estudante sira mesak foos fuhuk tamba ne’e husu ba Parlamentu Nasional atu haree kona ba kestaun ne’e. 

“Ami identfika eskola lubuk ida ne’ebe mak iha Dili laran, maibe hau refere ba eskola rua deit, ida iha eskola bazika Hera, bainhira sira lori foos ne’e to’o iha fatin, foin soe tun husi kareta hatun ba rai hanesan ema hatun semente husi kareta ba rai, nune’e mos iha Dili laran hanesan Hudi-laran, agora foss ne’ebe mak iha, foos ne’e hotu-hotu kinur hotu depois foos balun ke hut hanesan sementi, bainhira hatun nia suar deit mak sa’e, ida ne’e la merese para atu konsume,” dehan Profesor. 

Sira mos husu ba Ministeriu Edukasaun atu halo revizaun ba lei baziku edukasaun kona ba sitema nove anos eskolaridade no husu mos atu halo reverifikasaun ba dadus profesores bolontariu ne’ebe eziste iha Timor laran.

.