“Singapura Apoiu Pozisaun TL Ba Kazu CMATS”

.

Foto, La'o Hamutuk

Jornal Independente - Tersa-Feira, 11 Junho 2013 

Membru ASEAN balun fo ona sira nia apoiu ba pozisaun Timor Leste iha kazu akordu Certain Maritime Agreement in The Timor Sea (CMATS), tanba konsidera Timor-oan iha direitu fundamentu nu’udar na’in. 

“Ne’e duni, foin dadauk, hau ba vizita iha membru nasaun ne’ebe nanis ona sai membru ASEAN, sira mos apoiu ita, tanba (mina no gas), Greater Sunrise ne’e tenki dada duni mai Timor Leste, tanba ita nia direitu, importante mak Timor-oan tomak tenki lia fuan ida de’it, katak ida ne’e ita nia direitu,” esplika Primeiru Ministru Xanana Gusmao iha konferensia imprensa, segunda horsehik, hafoin fila husi viazen espesial ba membru nasaun ASEAN. 

Xefe Governu ne’e konfesa koalia ona ho membru ASEAN balun, liu-liu nasaun Singapura kona ba kazu akordu CMATS nian. Xefe Governu ne’e dehan, Timor Leste kontinua ho nia pozisaun tenki dada kanu Greater Sunrise mai rai lulik ida ne’e, tanba Timor-oan tomak senti kaer metin direitu nu’udar nain. Besik fulan rua ona, Governu Australia seidauk responde karta notifikasaun husi Primeiru Ministru Xanana Gusmao ba pozisaun Timor-Leste nian atu lori kazu CMATS ba abitrazen Internasional no Tribunal Internasional iha tinan oin. 

Maske seidauk hetan resposta, Timor-Leste kontinua buka ona nia advogado husi Inglatera no hili ona arbitrazen Inglatera nian hodi rezolve kazu ne’e.

 “Hau hare sira nia (Australia) esteitmentu ne’e iha ultima fraze sei fo resosta, ne’ebe kestaun hotu ita tenki la’o ida-idak nia dalan, atu nune’e buat hotu bele responde ida-idak nia direitu, ne’ebe kestaun sira ne’e presiza povu tomak akompania,” salienta Xefe Governu. Bainhira husu kona ba kooperasaun bilateral entre Timor-Leste ho Australia iha kazu ne’e, 

Xanana ho oin seriu hateten, la signifika relasaun kotu, nia dehan, akordu CMATS kestaun ketak, no asuntu bilateral kestaun ketak.

 Diario ne’e mos halo ona apoitmentu ida ho Embaixador Australia ba TL atu halo intervista no haruka tiha perguntas eskrita liu husi via E-mail, maibe to’o notisia ne’e publika seidauk hetan resposta. 

.