“SES Husu Deskulpa Ba Deputadu Manuel Castro”

.

Jornal Nacional Diario - Kuarta-Feira, 05 Junho 2013

Sekretariu Estadu Seguransa (SES), Francisco Guterres lori instituisaun Policia Nacional Timor Leste (PNTL) nia naran husu deskulpa ba deputadu Manuel Castro, nebe membru PNTL husi unidade Taks Force baku no hasai lia fuan aat sabadu liu ba iha Audian Dili. 

Sekretariu Estadu Seguransa (SES), Francisco Guterres hato’o deskulpa ne’e iha Plenaria Parlamentu Nasional (PN), Tersa (04/6) konaba atuasaun task force hasoru membru PN.

 “Hau lori instituisaun nia naran hakarak hato’o deskulpa ba Sr. Deputadu manuel Castro ba atuasaun sira ne’e, ami iha kumprimisiu nafatin atu buka hadia, se deit mak kontra regulamentu ami sei halo atuasaun forte, no foti sansaun tuir gravidade ne’ebe komete,” deklara SES, Francisco Guterres iha Plenaria PN.

 Francisco Guterres haktuir katak, dekretu lei numeru 4/2011 rejime juridiku uja ba forsa ne’e tenke enkaixa iha ne’eba, katak, kualker membru PNTL ida kuandu halo atuasaun tenki atuazerva ba regulamentu ne’ebe refere, se kuandu la atuzerva regulamentu ne’e nia tenki responsabliza ba ninia asaun ne’ebe mak nia halo.

“Kestaun ida ne’e hau konkorda ho Sr. Deputadu katak, polisia tuir dekreitu lei ne’ebe mak aprova tiha ona uza forsa kuandu kestoens sira seluk, kuandu medidas sira seluk…., hotu ona mak nia foin bele uza forsa, ne’e seidauk bele uza kualker forsa atu bele halo atuasoens ba ema ida,” koalia Francisco.

Ba akontesementu refere, SES Francisco afirma katak, kazu refere SES orienta ona ba komandu PNL atu investiga klena no sei toma medida hasoru membru Task Force ne’e.

Iha oportunidade ne’e, SES informa katak, iha tempu badak ne’e komando PNTL sei husu deskulpa mos ba vitima deputadu Manuel Castro ba hahalok membru Task Force ne’e. Nune’e, hatan b alia fuan deskulpa SES, Francisco Guterres, deputadu bancada FRETILIN, Manuel Castro, nu’udar vitima ho lian maka’as lakohi simu deskulpa ne’ebe SES, Francisco fo ba nia.

“Ho deskulpa ne’ebe mak sua exelencia fo mai hau, hau hanoin bah au la serve atu simu ita boot ninia deskuklpa ne’e, ita boot bah usu ba povu tihun atus haat resin ne’ebe mak haruka ami mai tur iha parlamentu ida ne’e, labele husu ami, ami ne’e hanesan imi nia atan, atan ne’ebe servi imi laloos, labele husu mai ami, tanba wainhira kuandu nia tolok hau populasaun sira sei hakilar hanesan ne’e deputadu 65 vota mak ami ba, laos hanesan imi ba hadau malu kadeira, ne’ebe ita boot hakarak husu, husu ba povu rihun atus ida resin ne’ebe iha ne’e, liu-liu sira ne’ebe mate atus rua resin agora ninia mina, nini bokur be ita hotu-hotu susu deit, husu ba sira labele husu mai hau", deklara deputadu Manuel ho oin hirus.

Ba kazu ne’ebe refere, deputadu Manuel Castro ne’ebe mak nu’udar vitima no deputadu sira seluk mos ezizi Parlamentu Nasional para harii Comicao Inkeretu Parlamentar hodi investiga kazu refere.

 Husi hahalok krime membru task force hasoru Membru Parlamentu nasional (PN) ne’e sira PN sente la seguru, tanba nudar oragun soberanu Polisia bele halo ona asaun krime hasoru membru PN iha publiku ninia leet, ne’e duni atu investiga hun husi problema nee hodi hatudu lia los katak, se los mak sala.

.