Servisu La Tuir Title: “PM Xanana Husu KFP Halo Revizaun”

,

Jornal Timor Post - Sabadu, 01 Junho 2013 

Primeiru Ministru Kay Rala Xanana Gusmao, husu ba Komisaun Funsaun Publiku (KFP) atu halo revizaun ba lei funsaun Publiku nian, tanba afinal to’o oras ne’e funsionariu publiku sira halao servisu la tuir area (title). 

“Tenki halo revijaun, atu nune’e bele monta funsionariu sira tuir duni ninia title, kuandu assume kna’ar ruma iha Ministeriu nia laran,” afirma Xanana iha nia diskursu inagurasaun Ponte Comoro II, Kinta (30/05), relasiona ho informasaun ne’ebe nia nota ona katak, iha Funsionariu Ministeriu negosiu Estranjeiru no Kooperasaun (MNEK), ne’ebe remata Kursu iha area agrikultura. 

 “Hau rona iha funsionariu ida iha Ministeriu Negosiu Estranjeiru remata ninia estudu iha sarjana agrikultura oras ne’e hetan fatin iha Ministeriu refere, hau la hatene nia atu ba halo to’os iha edifisiu embaixador Timor nian iha estranzeirus karik,” lamenta Xanana. 

Nia hatutan, se ida ne’e de’it mos ita (KFP) la bele haree ona, oinsa ita atu hadia jestaun iha Ministeriu nia laran,” hateten Xanana. Tanba ne’e, nu’udar Xefe Governu, xanana afirma, husu ba Komisaun Funsaun Publika (KFP) atu haree fila fali kestaun sira ne’e. 

 Xanana hatutan, dala barak funsionariu sira hadau malu pozisaun para atu hetan level iha Ministeriu nia laran, tanba ne’e sira rasik mos la senti aan pozisaun ne’ebe mak nia simu ne’e serve duni ka la’e. 

 “Iha MNEK ita admira sarjana Agrikultura ida mak iha ne’eba nia atu halo saida, atu ba kuda aihan produtu lokal Timor nian iha estranjeirus, ou atu ba halo pormosaun produtu lokal ita nia iha rai liur,” hatutan tan Xanana. 

Tanba ne’e, Xanana afirma tan, KFP tenki matan moris para atu lalais haree problemas sira ne’e, labele husik kestaun sira ne’e sai naruk liu tan. To’o notisia ne’e hatun, Timor Post seidauk halo konfirmasaun ho Prezidenti Komisaun Funsaun Publiku, Liborio Pereira. 

.