“Seitor Seguransa Viola DH Barak Liu”

.

Jornal Nacional Diario - Tersa-Feira, 11 Junho 2013 

Organizasaun naun Govermental Asosiasaun HAK durante ne’e halo monitorizasaun detekta katak, seitor seguransa mak viola Direitus Humanus (DH) barak liu. 

Diretur Interinu Asosiasaun Hak, Manuel Monteiro Fernandes, hatete Hak nudar organizasaun ne’ebe hamrik atu defende direitus humanus halo mos monitoriza ba direitu sivil politika oinsa mak membru Polisia hala’o nasuan diak, tane aas direitus humanus iha publiku, tanba sira sai ajente ida ne’ebe halo promosaun ba direitus humanus. 

 “Maioria husi kazu ne’ebe ami simu violasaun direitu humanus boot liu maka komete husi instituisaun seguransa hanesan baku no halo torturasaun ba ema,” Diretur interino Asosiasaun Hak, Manuel Monteiro Fernandes, relata asuntu ne’e ba JNDiario, segunda (10/6) iha nia kna’ar fatin Palapaco, Dili, bainhira husu Hak nia observasaun ba seitor seguransa. 

Buat ne’ebe Hak hetan mak torturasaun seguransa no Polisia Militar halo ba ema sivil, husi sira nia hahalok ne’e viola ona direitus humanus no lei ne’ebe garante ema nia vida nudar humana. 

Kauza husi ne’e mak, Manuel afirma katak, formasaun la sufisiente ba ajente PNTL sira atu kompriende no intende didiak instrumentu legal ne’ebe iha hodi implementa orden ne’ebe tula iha sira nia kaba’as. 

 “Ajente PNTL sira ne’e kuran hetan formasaun ba lei inan, kodigu penal, prosesu penal, kodigu sivil no lei seluk inklui konvensaun sira ne’ebe TL ratifika ona,” haktuir Manuel. 

Iha oportunide ne’e, Hak sujere atu hasa’e tan formasaun ba membru PNTL, tenki hari academia ba sira ho kualidade atu hela, rekrutamentu ba ema sira iha seguransa sivil tanba sira hatene ona lei no orden no hadia salariu membru sira nian, nune’e sira bele halo servisu ho diak no defende povu nia direitu ne’ebe segura iha lei inan no seluk.

.