S.E. PREZIDENTE REPÚBLIKA KONGRATULA PRIMEIRU-MINISTRU FOUN AUSTRÁLIA

.

Dili, 28 Juñu 2013 – S.E. Prezidente Repúblika Taur Matan Ruak, sesta ne’e hato’o parabéns ba Sr. Kevin Rudd ne’ebé mak eleitu iha kuarta-feira semana ne’e nu’udar lider Partidu Traballista, no konsekuentemente asume pasta nu’udar Primeiru-Ministru foun emposadu iha kinta-feira semana ne’e.

Xefe Estadu hatete: “Ha’u hato’o ha’u-nia parabéns ba Sr. Kevin Rudd ne’ebé mak foin eleitu ba Primeiru-Ministru foun Austrália nian.

Amizade entre Timor-Leste ho Austrália hahú kleur tiha ona dezde Funu Mundiál ba daruak nian.

Ha’u fiar iha Sr. Primeiru-Ministru nia lideransa katak ita-nia amizade ne’e sei metin liután.” Xefe Estadu hatutan: “Iha ha’u-nia mandatu ne’e ha’u sei esforsu atu relasaun Timor-Leste ho Austrália sólidu liután la’ós de’it iha nivel aas maibé akontese mós entre povu ho povu.”

 Primeiru-Ministru Kevin Rudd manán Julia Gillard iha eleisaun interna Partidu Traballista nian iha kuarta-feira ne’e, nune’e nia mak sei governa to’o eleisaun jerál ne’ebé mak sei hala’o iha fulan Setembru tinan ne’e.

Julia Gillard asume pasta Primeira-Ministra iha tinan 2010 hafoin Kevin Rudd nia rezignasaun iha tempu ne’ebá hanesan Primeiru-Ministru.

Foto de,  Presidencia da Republica de Timor Leste

Editor Foto: Paizinho Tilman
Fotógrafo: Abick Carceres

.