Prosesu Greater Sunrise: “Governu TL Hein Resposta Australia”

.

Jornal Nacional Diario - Tersa-Feira, 11 Junho 2013 

Primeiru Ministru Kay Rala Xanana Gusmao informa katak, prosesu ba Greater Sunrise (GS) agora dadauk ne’e sei paradu hela, tanba Governu Australia promete ona atu fo resposta ba governu Timor Leste kona ba kazu ida ne’e, maibe Governu Australia seidauk realiza ida ne’e. 

“Kona-ba Greater Sunrise, iha komunikasaun entre Primeira Ministra Australia Julia Gillard, antes sira halo statementu ba publiku, embaixador Australia ne’e ba hasoru hau iha Liquica, tanba momentu ne’eba, hau iha ne’eba, iha ultima fraze husi estatementu ne’e hateten katak, ami sei fo resposta,” PM Xanana iha Aeroportu Internasional Nicolau Lobato Dili, bainhira fila husi nia vizita ofisial ba Malaysia no Singapura.

 Tanba ne’e mak to’o agora dadauk ne’e Governu Timor Leste sei hein hela resposta ne’e husi Governu Australia, informa xanana. Xanana akresenta nuudar xefe do Governu, nia liga ho Primeiru Ministra nia estatment ne’e, bainhira resposta husi governu Australia to’o ona iha Governu TL nia liman, mak governu sei tetu resposta ida ne’e. 

 Maibe xefe do Governu ne’e mos kestiaona kompania ne’ebe mak atu implementa servisu ida ne’e, tanba to’o agora sira seidauk hatudu buat ida ba governu, xanana dehan, Governu Australia iha loron 60 atu fo resposta mai Governu Timor Leste, kona ba prosesu ida ne’e. 

 “Agora dadaun ne’e hau hein hela sira, tanba sira iha loron 60 atu fo resposta mai ita, kuandu buat ne’e hanesan ne’e ona, katak hanesan ne’e mak hau foin esplika ida ne’e,” Tenik Xanana. 

Eis lider Rejistensia ne’e hatutan katak, agora dadaun ne’e komunikasaun entre Governu Australia ho Governu Timor Leste kona-ba Greater Sunrise ne’e, lao diak hela. Maibe Governu Timor Leste kontinua ejiji ba Governu Australia responde lalais ona ejijensia Governu Timor Leste nian ne’e, relasiona ho estetimentu ne’ebe sira hato’o ba Governu Timor Leste. 

,