“PR Taur Hakarak Veteranu Falsu Tama Kadeia”

,

Jornal Independente - Segunda-Feira, 10 Junho 2013 

Prezidenti Republika (PR) Taur Matan Ruak husu sekretariu Estadu Veteranu nian atu halo verifikasaun didiak ba dadus ne’ebe veteranu sira hatama kuandu iha falsifikasaun ruma tenke hatama ema ne’e ba kadeia. 

 “Hau hakarak na’in ida-rua ba tur iha kadeia kuandu faslifika dokumentus, tan osan ne’e lori raan no isin mak sosa, no tenke halo ho onestu,” dehan PR Taur bainhira konvoka dialogu ho komunidade Manleuana, Dili foin lalais ne’e. 

Xefe Estadu dehan, veteranu sira iha dignidade no dignidade ne’e mai husi veteranu sira, ne’e duni, kuandu veteranu sira la kontrola malu hodi identifika ema halo falsifikasaun, entaun veteranu sira mak sei estraga sira nia imazen rasik. 

 Kona-ba problema veteranu, PR Taur dehan, tanba saida mak to’o agora seidauk hotu, tanba ema barak no la’o oituan deit, rezistu 2003 iha 75,000, rejistu 2009 125.000, no hamutuk 200.000, maibe seidauk hotu tanba barak mak seidauk rejistu.

 “Ami labele halo hotu kedas agora, ne’e ami labele promete, tanba bele sai rpomesas falsu, maibe neineik no beibeik sei hotu,” tenik PR Taur. Nia dehan, veteranu no antigo kombatente sira tenki hanoin, tanba sira ne’e minoritas kompara ho Timor-oan tomak, ema barak mak presiza atu governu tau atensaun, presiza haree ba karuk-loos, kotuk no oin hotu. 

Nune’e mos, Xefe Esatdu husu ba sira ne’ebe simu subsidiu husi estadu atu utiliza didiak, tanba oras ne’e dadaun orsamentu hirak ne’e mai husi deit mina no gas. Taur garante ba povu hotu katak, Timor Leste kompara ho nasaun seluk, halo buat barak iha tempu badak, tanba nasaun barak iha mundu, iha tinan barak ukun an la halo buat ne’ebe hanesan Timor Leste halo. 

 Tuir PR Taur, nasaun ne’ebe ukun an tinan 10 resin ona mos nia ferik katuas la simu osan, Timor-Leste foin ukun an tinan sanolu resin deit, nia ferik katuas sira simu ona osan. Nia mos fo ezemplu, Indonesia ne’ebe mak ukun an kleur ona, to’o agora nia veteranus seidauk simu hotu osan, nasaun sira ne’ebe koalia lian Portuguesa hanesan Angola, Mosabique sira agora mak foin komesa.

.