“Polisia Seidauk Identifika Kazu Baku Deputadu”

.

Jornal Timor Post - Segunda-Feira, 10 Junho 2013 

Kazu Deputadu Manuel Castro husi Bancada FRETILIN ne’ebe hetan baku husi oknum Polisia Task Force seidauk hetan investigasaun tanba polisia rasik seidauk simu keixa formal husi vitima. 

“Kona ba Deputadu Manuel Castro nia ne’e, oras ne’e dadaun seidauk halo prosesu investigasaun tanba keixa seidauk tama e bainhira ema hato’o keixa husi vitima rasik ne’e iha buat rua, ne’ebe mak ita presiza halo investigasaun, ida kona ba krimi nian, no ida seluk mak displinar,” Komandante Distritu Dili, Superitendenti Xefi, Pedro Belo hateten iha konferensia imprensa iha komandu Distritu Dili, Sesta (7/6). 

Pedro hatutan, vitima rasik tenki ba hato’o keixa iha eskuadra polisia ou bele ba iha diretamente Ministeriu Publiku (MP) atu hato’o keixa, nune’e MP bele halo notifikasaun no displinar liu husi komando jeral ou komandante Distritu para atu halo despaisu ba sesaun justisa hodi halo investigasaun. Nia realsa, to’o oras ne’e dadaun ema hotu koalia, maibe keixa formal ida kona ba kazu sira ne’e seidauk hatama ba iha MP no Polisia nian. 

 “Hau hanoin iha momentu ne’eba mak nia in volve idretamente ba iha problema ida ne’e, no nia ami haruka ona ba iha Tribunal no nia hetan ona pensaun ne’ebe mak semana-semana nia mai halo aprejentasaun iha polisia,” nia dehan. 

Deputadu Manuel Castro diskunfia hetan baku husi oknum membru Polisia husi Unidade Task Force foin lalais ne’e iha area Audian. 

.