“PN Hasai Rezolusaun Ba Kazu Baku Deputadu”

.

Jornal Independente - Kinta-Feira, 06 Junho 2013 

Parlamentu Nasional (PN) hasai rejolusaun hodi kondena no eziji Governu atu halo inkeretu investigasaun urjentimente ba aktus pesoal Polisia Task Force ne’ebe baku Joven ida no deputadu husi Bancada FRETILIN. 

Objetivu seluk husi rezolusaun ne’e atu prevene ba futuru kazu ne’e labele akontese tan. Rezolusaun ne’e hasai iha kuarta (5/6) ho numeru 10, liu husi votasaun 45 Afavor, kontra 0, abstensaun 1, deskonfia pesoal Policia Task Force baku joven ida naran Pedro (Apeu) nu’udar Trabalador iha loja Lucky Lake House hodi rejulta tan deputadu manuel Castro mos hetan baku. 

Deputadu husi Bancada FRETILIN Joaquim dos Santos liu husi plenaria hateten, rezolusaun ne’e tenki hasai, atu nune’e prosesu investigasaun bele deskobre sala nia hun, hodi bele evita hahalok at ne’ebe membru Task Force komete. 

Tanba dehan deputadu ne’e, kuandu la hasai rejolusaun bele hamosu pilatos iha prosesu investigasaun. “Ne’ebe hau hanoin presiza nota ben ruma, atu nune’e prosesu investigasaun bele loos, purke se la’e bele sai fali kambing hitam, balun mak sai fali anju, hodi bele hatene motivu husi kazu ne’e,” dehan Deputadu Opozisaun ne’e. 

Deputadu nuudar vitima ba kazu ne’e hateten ba INDEPENDENTE katak, rezolusaun ne’e hasai primeiru hodi kondena aktus ne’ebe komete husi membru Polisia Task Force, segunud rezolusaun ne’e atu fo hanoin ba Governu liu husi Sekretariu Estadu Seguransa (SES), atu bele kria formasaun ba PNTL tomak, ikus liu husi rezolusaun ne’e Parlamentu nasional eziji nafatin ba Governu atu halo inkeretu investigasaun ho urjentemente. 

“Hau nia sujestaun mak ne’e, se bele membru polisia sira atu halo atuasaun iha terenu presiza hatene loloos motivu kazu ne’e, no presiza respeita direitus humanus, atu nune’e sosiedade ho PNTL bele sai amigo diak,” tatoli deputadu husi Bancada Opozisaun ne’e. 

Entertantu, Prezidenti Komisaun B, Trata asuntu Defesa no Seguransa, Maria Lurdez Bessa hatete katak, rezolusaun ne’e hasai bazeia ba atetude membru Polisia Task Force nian, neebe mak baku joven ida kanek grave no to’o ikus mai rejulta tan deputadu Bancada FRETILIN, Manuel Castro atu hetan Pankada. 

“Rezolusaun ida ne’e hanesan instrumentu politika ne’ebe mak Parlamentu nasional hasai atu kondena maka’as atuasaun Polisia ne’ebe foin dadauk hala’o ba sidadaun ida no mos ba deputadu ida,” tenik deputada Partidu Demokratiku ne’e. 

“Hau hakarak hateten ba ita boot sira katak rezolusaun ne’e mos hanesan politika deit, para atu hatudu lolos deskontentimentu parlamentu nian kona ba atusaun ne’e,” dehan nia iha PN horseik (5/6). 

Prezidenti Komisaun B ne’e mos konsidera kazu ne’e grave tebe-tebes, tanba ne’e maka rezolusaun ne’e hanesan instrumentu no desizaun politika hodi kondena hahalok ne’e, Deputada Bancada PD ne’e mos husu ba komando PNTL atu investiga didiak kazu ne’e, atu nune’e bele hetan solusaun tuir rezultadu investigasaun. 

Komisaun B mos akompania prosesu investigasaun, atu nune’e prosesu investigasaun bele la’o loos no justu. 

.