Papel Media Importante; “Ukun Nain Labele Diskrimina Media”

.

Jornal Nacional Diario - Sesta-Feira, 14 Junho 2013

Primeira Dama, Isabel Fereira husu ba ukun nain sira atu labele taka-an ba media no diskrimina media (Jornais, Radio no televizaun), tanba papel media hotu-hotu importante teb-tebes ba dezenvolvimentu nasaun.

 Primeira Dama hateten, povo presiza informasaun, tamba ne’e husu ba ukun nain sira atu fahe informasaun ba media hotu-hotu atu hato’o ba povo konaba saida mak Estado no Governu halao ona no saida mak seidauk halao,” primeira dama Isabel Ferreira, deklara asuntu ne’e ba Jornalista sira, Kinta (13/6) iha Hotel Vila-Verde Dili, hodi fo ninia komentariu kona ba Vice Ministra saude,

Natalia de Araujo ne’ebe halo ba Jornalista, Jornal sira hodi lakohi fo intervista, no pior liu tan hasai liafuan hakarak mak Televizaun no radio mak fo intervista.

Primeira dama ne’e dehan tan, tantu media no jornais, televizaun no radio iha papel ne’ebe mak hanesan, tanba hotu-hotu foti informasaun husi Povu, estadu, Governu no entidades sira seluk hodi publika ba publiku.

Nia hatutan, povo labele hatene saida deit mak Governu no estadu halo bainhira laiha media, tanba ne’e husu ukun nain sira hotu-hotu hodi loke an ba media hotu.

“Hau hein katak, ita nia ukun nain sira hotu-hotu bele nakloke ba publiku, liu-liu kona ba saida mak lao iha ita nia nasaun, ita nia estadu tenke ser publiku hatene,” husu Isabel.

.