ONG Luta Hamutuk; “Tenke Ezekuta Orden Xanana”

.

Jornal Timor Post - Tersa-Feira, 04 Junho 2013 

ONG Luta Hamutuk (LH) husu ba komisaun Funsaun Publiku (KFP) atu ezekuta orden ne’ebe Primeiru Ministru (PM) Xanana Gusmao ne’ebe husu KFP tenke halo reformasaun ba funsionariu publiku sira ne’ebe barukten. 

 “Hanoin Primeiru Ministru (PM) ne’e realidade no pozitivu tebes, realidade durante ne’e governu rekruta funsionariu publiku barak maibe maioria husi sira baruk ten, tama servisu halimar ‘game’ ho ‘facebook’, atu hadia asuntu ne’e KFP tenke halo reformasaun,” Diretor LH interinu Zenelton Zeneves ba Timor Post iha nia kna’ar fatin, segunda (3/6). 

Zenelton haktuir katak, ho deklarasaun PM nia ne’e foin dadauk iha media ba publiku hatudu katak, nia nota ona servisu barak iha Ministeriu la la’o. 

 “Se ba oin KFP la kumpri orden PM Xanana hodi halo reformasaun, governu sei investe osan saugate ba funsionariu publiku,” dehan nia. Maibe, tuir nia, klaru KFP mesak labele kontrola funsionariu ne’ebe barak tebes, tan ne’e, nia propoin ba Ministeriu hotu tenke kontrola funsionariu publiku sira iha loron servisu, no husu Ministeriu no Sekretariu Estadu sira maka tenke hatudu uluk desplina. 

Antes ne’e, Primeiru Ministru kay Rala Xanana Gusmao hateten durante ne’e nia rasik simu informasaun katak iha funsionariu balun remata ninia estudu iha Universidade maibe servisu fali iha fatin ne’ebe la’os ninia fatin. 

“Hau rona iha Funsionariu ida iha Ministeriu Negosiu Estranjeirus remata ninia estudu iha sarjana agrikultura oras ne’e hetan fatin iha Ministeriu refere, hau la hatene, nia atu ba halo to’os iha edifisiu embaixador Timor nian iha estranjeiru karik,” Xanana informa. 

Entertnatu, Deputado Eladio Faculto husi Bancada FRETILIN husu ba Primeiru Ministru Xanana Gusmao atu hatudu asaun ba preokupasaun funsionariu publiku balun ninia estudu iha agrikultura, maibe servisu fali iha Ministeriu negosiu Estranjeiru no koperasaun. 

 Deputadu ne’e husu ba xefe governu atu hato’o karta ba komisaun Funsaun publiku (KFP) atu halo revizaun ba funsionariu ne’ebe servisu la tuir area ne’e. 

“Agora ema ne’e remata estudu iha agrikultura ka konstrusaun nian ita tau fali ba iha servisu diplomata nian ne’e la los ona, ne’e akontese tanba mos iha tendensia KKN, liu-liu ba sira ne’ebe kaerira politiku sira,” deputadu Eladio ba Timor Post iha PN, segunda (3/6). 

Nia haktuir, iha nasaun ne’ebe de’it, loke konkursu publiku tenki iha kriteriu oi-oin, hanesan atu applay ba vaga ruma tenki iha background ba area ne’ebe espesifiku. Iha fatin hanesan, deputadu Paulino Monteiro husi bancada PD sublina lei KFP nia fo dalan ba sidadaun hotu atu bele konkore ba konkorsu tuir hakarak ou tuir esperensia servisu ne’ebe iha.

 “Hau hanoin ita nia lei mos fo dalan ba sidadaun hotu atua play vaga servisu maske la tuir area estudu, maibe tuir esperensia servisu ne’ebe bele hala’o kna’ar ho diak,” nia esklarese.

,