Oknum Taks Force Baku Membru PN “PN Ejiji Investigasaun”

.

Jornal Nacional Diario - Tersa-Feira, 04 Junho 2013 

Polisia Nasional Timor Leste (PNTL) husi Unidade Taks Force baku no hasai lia fuan at hasoru membru parlamentu nasional (PN) iha sabadu (01/6) iha Audian, Dili. 

Membru PN nebe oknum Task Force ne’e baku mak naran Manuel Castro husi Bancada Partidu Opozisaun (FRETILIN) wainhira atu salva joven ida nebe membru polisia husi Unidade Task Force nian baku. Ho akontesementu ne’e, Parlamentu Nasional ejiji ba orgaun kompotente atu halo investigasaun klean ba oknum PNTL nebe halo krime hasoru membru PN ne’e. 

Vitima membru PN ne’e fo kornolojia katak, Polisia grupu ida baku lisuk joven ida iha Audian, Polisia lubun ida baku, tuku, tebe joven ida latan ba rai no dada hanesan karon a’at ida iha loos ninia oin tan ne’e nia ba salva no husu polisia sira labele baku, maibe polisia sira barak ne’e hamriik baku fali nia (membru PN-red). 

“Hau haree sente labele, hau loke tiha dalan depois hateten senor sira favor para labele baku ona, maibe polisia sira barak ne’e hamriik fila hasoru hataka fali hau, hateten bah au katak ho laiha direitu, ne’e ami (Polisia) nia direitu, hau hataan ne’e loos maibe tenki professional oituan, hau nuudar deputadu iha direitu atu koalia ba Polisia sira halo buat ne’ebe la loos, bainhira hau seidauk koalia hotu, polisia ida hasai lia fuan tolok hau no ida husi sorin tuku liu hau, kona hau nia hasan, depois ema barak iha sori-sorin hakilar dehan nia deputadu labele baku, ida husi sorin kontinua insulta deputadu sira ne’e mak halo lei la loos, ami baku imi rai la naben, tasi sei la sae,” Manuel Castro hato’o kronolojia akontesementu ne’e iha plenaria. 

Depois de akontesementu ne’e, nia husu kedas ba komando PNTL iha Kuartel Jeral Kaikoli, haruka fali ba iha komando Distritu Dili, Pedro Belo, nebe hateten, “Taks Force hau mak hari’i, mais hau la hanorin atu tolok,”. 

Iha momentu ne’e komandu husu atu rejolve kedas, maibe Deputadu Manuel castro la konkorda, ho hakarak kontinua prosesu kazu ne’e ba oin, tanba konsidera instituisaun PNTL mak hasoru orgaun Parlamentu Nasional. Ba atetude PNTL ne’e, Deputadu Cezar Moniz Mali, husi Bancada CNRT i hanesan mos membru komisaun B trata asuntu negosiua estranjeiru e defeza no seguransa nasional lamenta atuasaun ne’ebe mak elementus polisia halo hasoru deputadu Manuel Castro, tanba ne’e husu instituisaun kompotente tenki investiga klean asuntu ne’e. 

 “Estadu liu husi Governu hanesan jestor tenki seriu fo medidas ne’ebe grave, todan ba polisia para hodi hamate mentalidade sira hanesan ne’e, se lae sira arogansia bei-beik katak, sira baku ida sei baku tan ida seluk, entaun akaba por dignidade Estado lakon, ne’e halimar ho estadu laos pesoal, tanba ne’e deputadu,” haklaken Deputadu Cesar. 

Nia dehan, husi hahalok oknum Task Force ne’e hatudu inprofesionalismu iha publiku nia leet, tanba atuasaun ne’ebe mak la tuir regras ne’ebe mak vigora iha instituisaun PNTL. 

 .

 “Polisia baku deputadu sira, trata deputadu sira, hatete maustratus ne’e signifika komesa atu hatudu professionalismu polisia ninia ne’e iha parte ida ne’ebe? 

Tanba baku deputadu ne’e ultra pasa ona ka hakat liu regras ona, kuandu to’o ona membru sira, entaun sidadaun normal at liu, atuasaun tenki tuir regras ne’ebe mak iha lei organiku Polisia nian,” preokupa deputadu Cesar. 

Iha fatin hanesan, Deputadu Inacio Moreira husi Bancada FRETILIN, komenta plenaria segunda horseik labele halao tanba deputadu sira hotu-hotu halo intervensaun peokupa ho atuasaun elementu PNTL ne’e, nune’e Prezidenti parlamentu Nasional toma inisiativa hodi halo reuniaun ho lideres bancada no konseillho administrative Parlamentu nasional hodi koalia asuntu refere. 

Nune’e mos deputado Paulino Monteiro, husi bancada Partidu Demoktariku (PD) realsa katak, nia parte preokupa atuasaun PNTL hasoru Joventude no membru Parlamentu Nasional ne’e, tanba deputadu nuudar matan, tilun povu ninian, entaun wianhira nia haree polisia halo atuasaun ida ke la professional, entaun nuudar deputadu koalia para labele halo atuasaun hasoru sidadaun ho maneira baku iha fatin publiku. 

Ba akontesementu ne’e, segunda (3/6) PN la halao plenaria, tanba lideres Bancada halo sorumutu hodi koalia asuntu refere, tanba konsidera atusaun refere seriu, nune’e Prezidenti PN, Vicente Guterres toma desizaun halo reuniaun orzenti ho liders bancada no membru konsellu administrative PN atu halo desizaun ruma ba asuntu refere. 

 Hafoin reuniaun lideres bancada Parlamenta ne’e, deputadu sira rejeita fo rezultadu reuniaun ba media sira.

Nota: A Polícia Nacional de Timor-Leste está fora de controlo. Membros da "Task Force" bateram e insultaram um deputado da Fretilin, Manuel Castro. O representante do povo da oposição quando viu os policiais a espancarem violentamente um rapaz em Audian, foi tentar salva-lo e foi insultado. É urgente que se faça uma investigação à polícia, urgente!

.