“MOP Hakarak Sobu Ponte Komoro I”

.

Jornal Timor Post - Sesta-Feira, 07 Junho 2013 

Ministeriu Obras Publika (MOP) hakarak sobu Ponte Comoro I maske reprezetante povu iha uma fukun Parlamentu nasional la konkorda sobu tanba de’it konsidera ponte ne’e valor no kultura ne’ebe Indonezia rai hela. 

Sekretariu Estadu Obras Publikus (SEOP), Luis Vaz Rodrigues hateten, hanesan nasaun ida presiza dezenvolve no halo diak liu tan ponte sira ne’e tanba atu harii sidade ida tenki halo sidade ne’e sai diak liu tan. 

“Se ponte Comoro I ita la sobu konserteza la iha ona simetria atu ita halo beleza ba ita nia sidade ne’e la iha ona, wainhira ita halo ona Ponte ida, ida seluk ita tenki sobu para halo nune’e beleza hanesan,” nia esplika ba Jornalista sira iha edifsiu SEPFOPE, Caicoli, Kinta (06/6). 

Tuir nia katak, ponte atual ne’e, Governu Indonezia hari’i parese iha tinan 1988-1989, no ponte ne’e tuan besik ona tinan 40 no ponte ne’e sei metin hela, maibe tanba halo ona Ponte Comoro II ho modelu foun, tenki sobu ponte atual para halo hanesan, se ponte tuan ne’e la sobu, entaun hare ponte rua ne’e la kondis no iha ne’eba la sinkroniza ho beleza sidade Dili nian. 

Entertantu, Deputado Paulino Monteiro hateten, Orsamentu jeral Estadu 2012, la preve atu sobu ponte Comoro I maibe orsamentu milaun U$8 ne’e ba de’it konstrusaun Ponte Comoro II. Hatan ba ida ne’e, SEOP Luis dehan, orsamentu Milaun U$8 ne’e hanesan ‘single source’ (indikasaun direta) ne’ebe la tama iha orsamentu ne’ebe maka deskute iha PN maibe milaun U$8 ne’e tama iha fundus infraestrutura. 

“Orsamentu ne’e hanesan Single Source ne’ebe iha kuartu Governu Konstitusional fo fiar ba CNT atu hahu rehabilita estrada husi Tasi-Tolu mai to’o Palasiu Prezidenti, no depois husi Timor Plaza ba tasi ibun nian, ida ne’e maka inklui hotu Ponte Komoro,” nia esplika. 

 Nia dehan, kona ba rehabilitasaun estrada iha Dili laran ne’e orsamentu ketak (milaun U$29,9), maibe ba Ponte Comoro ne’e nia orsamentu Milaun $8, tanba ida ne’e indikasaun direta ne’ebe la liu husi tenderizasaun. 

Osan restu hodi sobu no hadia ponte atual, nia dehan, ponte ne’e ho total orsamentu miliaun U$8, maibe para atu sobu deit ponte tuan sei gasta osan miliaun ida, no miliaun U$8 ne’ebe determinadu ona ne’e kompania maka jere fali osan ne’e atu sobu ou harii foun nian. “miliaun U$8 ne’e ba ponte rua ne’e hotu, agora se mak jere osan ne’e, kompania sira maka jere,” nia tenik. Antes ne’e, 

Deputadu Inacio Moreira husi bancada FRETILIN la konkorda planu MOP atu sobu fila fali Ponte Comoro I tanba konsidera Ponte ne’e iha valor cultural ne’ebe invazaun Indonesia rai hela ba Timor Leste, tan ne’e tenki kuidadu.

.