“Migrasaun Identifika Ona fatin Prostituisaun Tolu Iha Dili”

.

Jornal Independente - Sesta-Feira, 07 Junho 2013 

Polisia servisu migrasaun oras ne’e identifika ona fatin protistuisaun tolu ne’ebe involve husi ema estrajeiru no Timor-oan. 

Diretor Servisu Migrasaun Superitendente Assistenti Polisia Jose da Costa hatete, oras ne’e parte migrasaun identifika ona fatin protistuisaun tolu iha Dili laran mak hanesan NB, OM BAR, no mos BAR ida iha aitarak laran. 

“Ami sei buka meus diak ruma para kaptura hotu sira no bele taka fatin ne’e, ami mos sei fo sansaun ne’ebe todan ba Bar nain sira ne’ebe loke fatin prostituisaun ne’e,” hateten Jose ba Independente iha Vila-Verde, Dili (6/6). 

 Nia dehan tan katak, iha fatin sira ne’e laos ema estrajeiru deit mak halo vida protistuisaun iha ne’eba maibe iha mos ema Timoroan barak mak envolve iha neeba, tanba ne’e mak kuandu sira kaer sira fo deit moral, ba ema Timoroan sira ne’e labele halo buat ida, tanba lei seidauk iha atu regula protistuisaun ne’e. 

Kona ba fatin ne’ebe mak identifika ona, nia dehan, sira sei buka dalan hodi koopera ho autoridade lokal no komunidade hodi nune’e bele kaptura ka halakon tiha iha kapital Dili ne’e. 

 “Ami kaptura ona ita nia feto Timor oan ne’ebe halao protistuta ne’e barak ona hanesan iha Hotel Futu, Aitarak laran besik palasiu prezidneti nia, ami fo moral deit depois husik fali sira, tanba seidauk iha lei atu regula kona ba ida ne’e,” dehan nia. 

 Kona ba sidadaun estranjeiru hanesan Indoensia no Xina ne’e kunadu kaptura sei haruka karta ba nia embaixada sira, atu nune’e bele mai lori sira nia ema sira ne’e atu hanorin sira no bele lori ema sira ne’e fila husi Timor Leste. 

Nia dehan tan, dala barak kuandu kaer feto Timor oan sira ne’ebe hala’o vida protistuta ne’e sira dehan servisu laiha maka sira halo hanesan nee. 

.