“Merenda Eskola Troka Ho Fahe Osan”

.

Jornal Nacional Diario - Kinta-Feira, 13 Junho 2013 

Ministeriu Edukasaun troka ona programa merenda eskolar ho fahe osan centavos 25 kada alunus iha loron ida hodi sosa hahan ne’ebe mak komunidade sira prepara tamba programa merenda eskolar durante ne’e lao la dun diak. 

“ME liu husi Diresaun Nasional Aksaun Sosial Eskolar (DNASE) halo mudansa ba programa merenda eskolar ne’ebe antes ne’e eskola mak prepara, maibe programa ne’e lao la dun diak, tanba ne’e halo ona mudansa ba programa merenda eskolar hotu sei simu osan 25 sentavus kada labarik atu sosa modo saida deit mak atu fob a alunus sira han, pruzempu hahan ne’ebe mak komunidade sira iha,” Ministru Edukasaun Bendito Freitas, hato’o asuntu ne’e ba Jornalista sira iha nia kna’ar fatin Vila-Verde, Dili, Kuarta (12/6). 

Bendito Freitas hateten, osan sira ne’e Ministeriu Edukasaun sei transfere ba konta bankaria diretor eskola iha Timor laran tomak ne’ebe hamutuk ema nain 202. 

Ba mudansa ne’e, Ministeriu Edukasaun husu ba Diretor Eskola sira hotu atu uja didiak orsamentu ne’ebe mak Governu alka ba kada eskola ne’e hodi programa refere bele lao diak. 

“Hau hakarak hato’o ba Diretor Eskola sira katak, uja didiak osan ne’ebe mak iha ne’e, atu implementa programa merenda eskolar e keta uja fali hanesan privadu no husu atu uja osan ne’e didiak, atu nune’e programa merenda eskolar ne’e bele lao ba oin,” apela Bendito. 

Nune’e mos, Ministru edukasaun hateten, ME sei buka dalan atu bele responde ba eskola sira ne’ebe maka seidauk hetan programa ne’ebe refere. 

“Ami mos buka dalan atu responde ba eskola ne’ebe mak seidauk iha merenda eskolar ne’e,” koalia bendito. 

Ministru edukasaun ne’e mos rezeita preokupasaun komunidade sira nian ne’ebe dehan merenda eskolar iha kotuk liu ba, tein fos at ba estudante sira. 

 “Hau la hare fos fohuk tanba fos ne’e iha armazen ami rasik ba loke fos ne’e hare kualdiade diak, ne’ebe hau la fiar fos fohuk,” Rezeita Bendito.

,