Mandatu Longuinhos Remata, “PM Xanana Sei Diskuti Ho PNTL”

.

Jornal Nacional Diario - Tersa-Feira, 11 Junho 2013 

Periodu tranzitoriu no mandatu komandante Jeral Polisia Nasional Timor Leste (PNTL), Komisariu Longuinhos Monteiro hela deit ona semana rua atu remata, tanba ne’e Primeiru Ministru nu’udar mos MInistru Seguransa no Defesa Kay Rala Xanana Gusmao promete sei deskute ho PNTL no Konsellu Superior PNTL nian atu bele haree kestaun ne’e. 

“Mandatu Longuinhos nian ne’e ami sei deskute hela, tanba ne’e maka hau hasoru malu ho konsellu Superior, tanba depois de periodu tranzitoriu remata, hau nia relasuan ho Polisia ne’e iha ona konsellu superior, atu haree problema sira nian,” Sublinha Kay Rala Xanana Gusmao iha Aeroportu Internasional Prezidenti Niciolau Lobatu, Comoro Dili, bainhira fila husi nia vizita ofisial mai Malaysia no Singapura. 

Xanana esplika katak, relasaun ida ne’e atu intende problema sira ne’ebe sira infrenta loro-loron, maibe periodu tranzitoriu ne’e sei iha semana rua tan. “Antes de hau ba, hau koalia mos ho Polisia liu husi Konsellu superior da Polisia, tanba tranzitoriu atu hotu agora iha 27 fulan ida ne’e, i ami mos temi dadauk ona asuntu baun hanesan ASEANPOL, ida ne’e ‘mau tidak mau’ (hakarak ka lakohi) Timor Leste tenki partisipa,” tenik Xanana Gusmao. 

Maske Timor Leste lahatene ekonomia internasional ne’e atu la’o oinsa, maibe kona-ba ASEANPOL hakarak ka lakohi Timor Leste tenki partisipa duni iha ne’eba, afirma Xanana. Antes ne’e Sekretariu estadu Seguransa (SES) Francisco Guterres mos hateten katak,

 Governu deskute ona futuru komando Jeral Polisia Nasional Timor Leste, tanba mandatu Komisariu Longuinhos Monteiro nian atu remata ona iha 27/7 agora. Francisco hatutan, tempo to’o ona atu hili Komandante Jeral husi Polisia nia laran, tanba situasaun tranzitoriu hotu tiha ona. 

“Ami mai hasoru malu ho Primeiru Ministru hodi koalia kona ba situasaun PNTL nian agora, ita hatene katak situasaun tranzitoriu liu ona, agora ne’e tenki fo ona tempo ba ema husi komando nia laran atu sira ne’e dezenvolve diak liutan kondisaun PNTL nian,” sublinha Francisco. 

.