“Lu-Olo Rekonese TL Seidauk Bele Implementa Munisipiu”

.

Jornal Nacional Diario - Segunda-Feira, 03 Junho 2013 

Eis Prezidenti Parlamentu Nasional iha Primeira Legislatura, Francisco Guterres ‘Lu-Olo’ hatete, Timor Leste ne’ebe foin ukun an iha tinan 11 nia laran seidauk bele implementa Munisipiu, tanba governu sentral rasik seidauk prepara diak. 

“Se husu hau kona b abele ona ka seidauk? Ne’e hau nia parte dehan deit katak, it abele halo desentralziasaun, maibe tempu ne’e mak seidauk bele, hau dehan deit katak, Primeiru, Governu sentral tenki prepara uluk kondisaun, katak iha governu sentral nia laran tenke hametin simu kompetensia no funsoens diak,” deklara eis Titular, Francisco Guterres ‘Lu-Olo’ ba Jornalista sira iha Centr Convensaun Dili (CCD), Kuarta (29/5). 

 Prezidenti Partido FRETILIN ne’e dehan tan katak, Timor Leste labele lori brani hodi halo buat ida ne’ebe seidauk bele halo, tanba tempu mak seidauk oportunu didiak atu bele implementa. 

“Hau hanoin ita presiza kondisaun uluk lai mak ita foin bele halo buat seluk ne’ebe ita presiza no ital abele hakat fali, ita tenki kria kondisaun didiak atu ita nia ema iha kraik ne’e bele halo servisu ho diak,” dehan Lu-Olo. 

Maske nune’e, Lu-Olo rasik seidauk bele dehan, banhira mak Timor Leste bele implementa munisipiu ne’e rasik, tanba desentralziasaun la’os buat ida ne’ebe halo dala ida, maibe presiza halo avaliasaun no preparasaun. 

“Hau la tau kalendariu, mash au nia mak kria kondisaun no kapasidade iha kraik, ita tenki hare ita nia kapasidade iha kraik ho governu sentral mak ita bele iha desentralizasaun ne’ebe seletivu atu Timor oan sir abele kaer,” tenik nia. 

Tuir Lu-Olo katak, iha fatores barak liu mak presiza hadia hodi prepara atu hakat ba iha desentralizasaun, mak kria sistema governu sentral ne’ebe diak atu bele haree kapasidade distritu sira nian. 

 “Hau hakarak atu kontribui desentralizasaun, hau hakarak buka atu fo mos hau nia opiniaun, hau seidauk hakat dok liu, maibe ita presiza kria kondisaun,” dehan eis Prezidenti PN ne’e.

.