“Lakohi Simu Osan Pensaun U$200, Funsionariu Barak Rejeita Reforma”

.

Jornal Independente - Kinta-Feira, 13 Junho 2013 

Funsionariu Publiku (FP) hamutuk nain 1.700 maka tama ona iha lista reforma tanba nia idade liu ona tinan 60, maski nune’e, funsionariu sira ne’e barak lakohi atu reforma tanba simu deit osan U$ 200 kada fulan. 

 Sekretariu Estadu Seguransa Sosial, Vitor da Costa hateten, iha Tempu UNTAET, rekruta funsionariu balun ho tinan boot ona, agora sira iha direitu atu tama ba lista reforma, entaun sira tenke kontribui osan salariu uituan-uituan, atu iha lista reforma sir abele simu osan husi sira nia kontribuisaun. 

Nia dehan, ba oras ne’e dadaun, funsionariu balun ne’eb ho idade liu ona 60, balun hatama ona rekerementu hodi hetan reforma, maibe barak mak lakohi tam lista reforma, tanba osan pensaun kiik liu kompara ho salariu ativu. 

Vitor fo ezemplo, funsionariu ne’ebe ho salariu U$600 kada fulan, bainhira pensaun ba reforma sei hetan de’it U$200, taba tenki tuir kriteriu ne’ebe fo sai komisaun Funsaun publiku, bazeia ba lei tranzutoriu, maibe lei laos tranzitoriu, maski nune’e, SESS labele halo buat suma tanba kompetensia ne’e kabe ba Komisaun Funsaun Publiku nian. 

 “Ami la bele halo buat ida, KFP maka iha kompetensia atu fo desizaun ba lista reforma ne’e,” tenik nia, iha servisu fatin, kaikoli, Dili (12/6). 

Nia hateten, funsionariu ne’ebe tama iha lista reforma sei konta husi telemovel, kareta ka motor no mos sasan estadu seluk tan, nune’e, Prezidenti Komisaun Funsaun Publiku, Liborio Pereira hateten, oras ne’e dadaun hahu ona reforma ba funsionariu publiku kuaze nain atus ida resin. 

Nia esplika liu tan, rezime tranzitoriu seidauk defini loloos limite masimu obrigatoriu, maibe limite deit husi tinan 60. “2015 sistema ddefinitivu ne’e prontu ona, mak sei defini klaramente limitidade neebe mak volontariu, limitidade hanesan obrigatoriu,” katak nia. 

Nia hateten, ba oras ne’e dadaun funsionariu balaun hakarak tama iha lista reforma, maibe balun lakohi, tanba komparasaun salariu pensaun reforma menus liu. 

“Mas ita hanesan ema, ita nia forsa mos limitadu, entaun ami husu ba funsionariu sira ne’ebe idade 65 ba leten diak liu reforma, atu nune’e bele goza liberdade iha uma hodi hamutuk ho familia sira hodi fo tempu ba maluk seluk no bele fo oportunidade ba ema seluk,” dehan Liborio. 

 Nia akresenta, pensaun reforma ne’e, ne’e laos dehan atu ara serviso, maibe iha tempu atu halo buat foun, liuliu kontribuisaun social iha sosieade nia leet. 

 Liborio hatutan tan katak, antes lei tranzito nee desksute, maioria funsionariu barak hakarak reforma, maibe lei ne’e aprova funsionariu barak mak dada an, tanba salariu ativu kompara ho salariu ba pensaun reforma nia menus liu. Funsionariu husi instituisaun estadu nian oras ne’e dadaun balun reforma ona iha fulan Marsu liu ba, tanba opsaun reforma mak dalan uniku ba funsionariu ne’ebe tinan 65. 

Lei reforma ne’e hateten 75 husi mediu salariu, sura husi ema ida tama funsionariu, manan hira, salariu ne’e sae oribainhira, atu nune’e, bele multiplika ba durante nia servisu, depois de mediu hasai 75 husi, hafoin bele tama ba prosesu reforma,” nia esplika. 

Prezidenti KFP mos promete, bainhira lei reforma sai ona difinitivu, sidadaun hotu-hotu iha direitu atu sai funsionariu, maibe tenki tuir prosesu rekrutamentu to’o ona tempu reforma tenki hakru’uk ba lei reforma ne’e.

.