Laiha Kondisaun Kontrola Tasi Timor “Lere: Peska Ilegal Naok Tesik Ne’e Ba”

.

Jornal Nacional Diario - Kinta-Feira, 13 Junho 2013 

Xefi Estadu das FALINTIL- Forsa Defesa Timor-Leste (F-FDTL), Maijor Jeneral (Maijen) Lere Anan Timur hateten, peska illegal naok ikan, naok tesik ne’eba tan ba, tanba F-FDTL la iha kondisaun atu kontrola tasi Timor. 

Xefi Estadu F-FDTL ne’e hateten, oras ne’e dadauk Ro F-FDTL ne’ebe iha ne’e ki’ik rua de’it, tanba ne’e labele kontrola to’o iha tasi klaran, ho rajaun bainhira ba ho ro ki’ik bele ameasa ba vida F-FDTL nian. 

“Peskas ilegais ne’e husik sira naok tesik ne’e ba, ita mos Ro la iha para ita ba, ita ba be, ita lori ita nia Ro kiik ne’e monu tama tasi laran iha ne’eba tamba deit ikan, ema ikan ida ne’ebe ne’e hahoris loro-lron, ita nia ema ba mak mate tan iha ne’eba, ne’e problema boot mas ita nia Governu hanoin ona,” dehan Maijen Lere. 

Maijen Lere hatutan, ondisaun ne’ebe mak Governu presiza kria mak konaba kondisaun hanesan presiza Ro boot no infra-estrutura hanesan hadia ponte kais, entaun ikan ne’e peska illegal sei naok hotu tanba ikan iha tasi laran sei hahoris maibe Governu kria kondisaun, nune’e seguransa bele hala’o nia knaar kontrola tasi laran. 

“Primeiru kria kondisoens, infraestrutura tenki halo ponte kais para ita nia Ro ne’e ba para, ne’e para hala’o servisu, ikan ne’e sira la bele naok hotu, ikan ida kuandu hahoris mai ne’e atus ida atus rua iha minutu ida ne’e,” dehan Lere. 

 Maske nune’e, Maijen Lere hatete, peska illegal sira ne’ebe mak naok ikan iha tasi Timor ne’e toman ona, ne’ebe wainhira kondisaun seguransa Timor nian iha tasi laran la’o diak ona peska illegal sira ne’e sei hetan konsekoensia ho sira nia hahahlok, ne’e tanba sei la moris tan ho naok. 

“Sira mak aban bain rua sei hetan konsekuensia, porque sira moris ho naok, aban bain rua ita kontrola ita nia tasi sira atu moris tan ho saida,” hateten Maijen Lere. 

 Maske nune’e, Sefe Estadu F-FDTL ne’e husu Timor-Leste tenki kuidadu no labele halao seguransa iha rai maran deit, maibe halao mis seguransa iha tasi laran, tanba ne’e maka oras ne’e Governu ho instituisan F-FDTL no Polisia Nasional Timor-Leste (PNTL) oinsa mak bele kombate krime organizadu, trafiku umanu, droga no buat oioin. 

Nune’e, tuir dadus ne’ebe mak fo sai husi Sekretariu Estadu Peskas (SEP) katak, Timor Leste kada tinan lakon 200 miloens dollar Amerikanu tanba peska illegal barak mak naok ikan iha tasi Timor. 

.