“Labarik Na’in Tolu Mout Iha Tasi Bebonuk”

.

Jornal Independente - Tersa-Feira, 04 Junho 2013 

Labarik nain tolu mout iha tasi, area Bebonuk nian, iha Domingu (02/6), husi labarik nain tolu ne’e, nain rua hetan tiha ona no nain ida seluk lakon. Labarik ne’ebe to’o agora seidauk hetan mak Eduardo Soares (8) no agora dadaun polisia hamutuk ho peskador sira buka tuir hela.

Aman husi vitima ne’e, Carlito da Concecao hateten, akontesementu ne’e akontese iha Domingu lokraik maizumenus tuku 4 labarik nain tolu ne’e ho idade 8-9 bolu malu ba hariis tasi.

“Hau nia oan no nia kolega nain rua ne’e iha domingu sira bolu malu mai haris tasi, hau la espera katak sira atu mout maibe derepenti mak akontese hanesan ne’e, hau atu ba buka iha ne’ebe,” dehan nia ho tristeza.

Hafoin akontesementu ne’e, inan-aman husi vitima sira informa kedas ba polisia Maritima no polisia to’o kedas iha fatin akontesementu hodi salva labarik nain rua ne’e no ida seluk mak lakon, polisia sira sei buka tuir hela. “hau hanoin sira polisia buka ho ro’o deit ne’e sei la hetan, presija luku mak bele hetan, tanba hau nia oan ne’e mout,” hateten Carlito.

Labarik nain rua ne’ebe hetan ne’e lori kedas ba Ospital Nasional Guido Valadares (HNGV) no to’o agora kondisaun seidauk saudavel tanba labarik nain rua ne’e hemu tasi been barak liu no ida seluk hetan kanek iha kotuk laran, deskonfia lafaek ka ikan mak tata.

Tuir observasaun diario ne’e katak, orsehik komunidade komoro nakonu hela iha fatin akontesementu hodi halo protesta maka’as ba UPM tanba buka tuir labarik ne’e hanesan fali hala’o patroila.

,