Komesa Servisu La Diak “PN Deskonfia Ba Problema Promosaun Diviza”

.

Foto de, Fonseca Lírio

Jornal Nacional Diario - Kinta-Feira, 06 Junho 2013 

Parlamentu Nasional (PN) deskonfia atuasaun polisia iha fat-fatin la tuir regras tanba la satisfetu ho promosaun diviza ne’ebe hamosu iha problema iha PNTL laran. 

“Bele realsiona ho promosaun, ita hotu hatene katak prosesu promosaun foin dadauk halo deskontentementu boot iha PNTL nia laran, bele mos tanba kronekus ne’ebe PNTL iha tinan barak ona i bele razaun buat barak, mas dala ida tan, ida ne’e laos kestaun para hatudu deskontentementu,” deklara Prezidenti komisaun B parlamentu nasional, Maria Lourdes Bessa ba JNDiario, Kuarta (5/6) iha PN. 

Nia husu ba membru PNTL sira atu labele uja nervozu tanba deit la gosta buat balun ne’ebe akontese iha instituisaun PNTL nia laran hodi melampiaskan fali ba sidadaun sira, ne’e la bele atu akontese. 

 “Atu gosta nia lider ka la gosta ninia lider ne’e hotu-hotu ninia direitu, forum de espresaun iha, kanais ba tenta hodi rejolve problema ne’e iha, hirarkia iha i labele hatudu dalan ida hanesan ne’e, atu troka ka la troka, atu gosta ka la gosta, lider ne’e buat seluk, ita iha instituisaun ne’e ita tenki respeita, maibe dalan atu hatudu deskontenti ne’e la’os hanesan ne’e,” haklaken Deputada Bessa. 

Nune’e mos, membru komisaun B, deputadu Antonio dos Santos ‘55’ haktuir, senti preokupasaun situasaun PNTL ikus-ikus ne’e halo atuasaun la tuir regra ne’ebe mak iha. 

“Ami mos foti ona konkluzaun tanba sa mak mosu problema ne’e, mos liga ba ho prmosaun, ida ne’e mak membru balun la dun satisfeitu ho promosaun ida ne’e, hau haree problema boot mak promosaun, tanba ami komisaun B intera prosesu ne’e desde inisiu to’o remata iha barak maka la satisfeitu ho promosaun ida ne’e,” koalia deputadu ‘55’. 

 Entertantu, deputadu Duarte Nunes, nudar membru komisaun B haktuir katak, bele mos akontesementu hirak ne’e tanba promosaun diviza foin lalais ne’e hamosu insatisfeitu husi PNTL balun.

 “Buat ne’e bele deskontentimentu iha ne’eba, tanba ida ne’e maka ami ejiji atu kria investiga buat sira ne’e, tanba saida mak akontese buat ne’e iha ne’e, ida ne’e maka Parlamentu seidauk iha hanoin atu kria komisaun inkeretu Parlamentu,” koalia deputadu Duarte.

.