Kintu Governu Kompleta Fulan 10 “Lu-Olo: Uza Orsamentu Estadu Lufu Lafu De’it”

.

Jornal Nacional Diario - Segunda-Feira, 10 Junho 2013 

Sabadu loron 8 fulan Junu, Kintu Governu Konstitusional ho naran Bloku Koligasaun (BK) nebe lidera husi Prezidenti CNRT, Kay Rala Xanana Gusmao ne’e kompleta ona fulan 10 Governasaun. 

 Iha fulan 10 ne’e FRETILIN observa Governu Bloku Koligasaun ne’e sei kontinua marka pasu no osamentu Estadu lufu lafu de’it. 

 “Governu ate to’o agora la hakat ba oin marka de pasu iha nia fatin, desde ke fromasaun de Governu ita haree katak, iha primeiru 100 dias, nein ate relatoriu ida aprezenta ba iha Parlamentu Nasional (PN) ou ba publiku para pelumenus ema hotu-hotu hatene dehan katak, koligasaun ninian iha loron atus ida nia laran ne’e sira halo ona saida-saida, i atu hakat tan fali ba tinan fiskal ninian saida-saida maka sira atu halo, portantu ne’e programa buat hirak ne’e hotu ne’e la sai ida,” 

Prezidenti partidu FRETILIN, Francisco Guterres Lu-Olo deklara asuntu ne’e ba JNDiario iha ninia Rezidensia Farol, Dili, hodi fo ninia observasaun ba servisu Governu Bloku Koligasaun (BK) durante ne’e. Eis Prezidenti Parlamentu Nasional ne’e mos fo ninia hanoin, Governu ne’e problema teb-tebes tamba povu hotu hein hela U$1.3 mileons de dollar ne’ebe mak aprova iha PN, povu hakarak atu haree ninia rejultadu, maibe ate to’o agora laiha, tanba laiha kapasidade. 

 “100 dias ate agora depois de arovasaun orsamentu iha PN ne’ebe Bankada hau nian, Partidu FRETILIN mos apoiu e ho rajaun para atu lori orsamentu ne’e para hadia povu ninian moris tanba ne’e maka FRETILIN apoiu, maibe ita haree katak to’o ate agora nein kada Ministeriu ida-idak ninian servisu ne’e atu halai to’o iha ne’ebe ona ita lahatene, ita lahare ninia rezultadu, portantu haree governu ne’e sai parado ona e laiha rejultadu ba sira nia Governasaun husi kada Ministeriu ida-idak ninia liu husi orsamentu ne’ebe aprova,” haklaken Lu-Olo. 

Primeiru Prezidenti Parlamentu Nasional ne’e akresenta katak, orsamentu ne’ebe maka Parlamentu Nasional aprova ba tinan 2013 ho montante U$1.3 milloens la lao, tanba konsidera jestaun no sistema ne’ebe maka iha la dun diak. “Sistema ne’e mak la dun diak, jestaun finanseiru no jestaun totalidade ba buat hotu-hotu ida ne’e mak hau haree katak sei fraku tebe-tebes,” haklaken Lu-Olo. 

Prezidenti Partidu ne’ebe sempre halo istoria ne’e mos nota katak, iha Governasaun Aliansa Maioria Parlamentar (AMP) to’o ohin loron dezenvolvimentu la la’o iha area hotu-hotu hanesan infraestrutura, saude, edukasaun, agrikultura no seluk tan, tanba la defini planu ida ke diak ba area sira ne’e. 

Lu-Olo observa katak, durante ne’e Ministeriu sira servisu rungu ranga deit, tanba Ministeriu ida ba hali fila fali servisu Ministeriu seluk nian, pior liu laiha kordenasaun servisu, hanesan SEPFOPE ba halo estrada iha fatin-fatin laiha kordenasaun ho MOP, entaun susar atu garante ninia kualidade estrada. 

“Kada Ministeriu ida ninia kompetensia halai tama fali ba iha Ministeriu seluk ninia kompetensia, ida seluk halai liu, borus liu tama fali ba iha ida seluk ninia kompetensia, entaun dala ruma sira halo konke lahatene kaer dehan katak, sira nia funsaun ne’e to’o iha ida ne’ebe i ida seluk ninian atu hahu husi ne’ebe i pior liu mak la iha kordenasaun diak entre sira,” koalia Lu-Olo. 

 .