Kazu Hera “Arguidu Ameasa Kadeia Tinan 25”

.

Jornal Timor Post - Kinta-Feira, 06 Junho 2013 

Ministeriu Publiku liu husi Prokurador Internasional Jose Luis Landim, liu husi alegasaun final ba kazu Hera husu ba Tribunal Distrital Dili (TDD) atu aplika pena entre 12 to’o 25 kadeia ba arguidu Mariano nu’udar membru Polisia Nasional Timor Leste tanba faktus provas komete krimi homesidu agravadu. 

Jose Landim mos husu ba Tribunal atu aplika pena suspensaun ba arguidu Agustinho ne’ebe komete krime ofencas ba integridade fizika simples. 

Landim esplika, razaun nia husu tinan 12 to’o 25 kadeia ba arguidu tanba faktus ne’ebe Ministeriu Publiku junta iha faktus hatudu provas katak, arguidu hanesan membru PNTL uza arma estadu nian hodi tiru mate vitima iha fatin atuasaun. 

 Entertantu, parte defeza reprejenta husi defensor Fernando de Carvalho husu ba Tribunal atu tetu didiak desizaun ba krime ofencas tanba polisia halo atuasaun tuir orden institusional. Tan ne’e, kona ba ktime homesidu agravadu ne’ebe Ministeriu Publiku alega ba nia kliente presiza investigasaun forensiku no ezame balistiku bele identifika loloos involku ne’ebe hamate vitima Armindo mai duni husi Mariano nia Pistola ka lae?

Antes Tribunal rona elgasaun husi Ministeriu Publiku parte defeza sei rona uluk deklarasaun husi sasin hanesan segundu komandante eskuadra Becora-Manuel da Cruz katak, nia parte to’o iha fatin akontesementu tiru sa’e pistola dala ida no primeiru komandante tiru sa’e dala tolu ho intensaun atu hatauk joventude sira ne’ebe taka dalan iha Hera. 

“Antes to’o iha fatin, komandante tiru sa’e dala 3 no hau rasik tiru sa’e dala ida, rajaun tiru sa’e atu joventude ne’ebe mak taka dalan bele lao ses, nune’e ami loke estrada, hau rona tan tiru dala ida maibe se mak tiru, hau la hatene tanba lao dook ona,” dehan Manuel ba Tribunal liu husi Juramentu, Kuarta (5/6) iha Tribunal Distritu Dili. 

Nia hateten, momentu ne’e joventude sira taka duni dalan ho fatin no ai mesak bobot, kuandu to’o iha fatin akontesementu joventude sira tuda tan, joventude ne’ebe mak iha area ne’e kuaze ema nain 40 ou 50 resin entaun polisia tenki tiru sa’e pistola ho intensaun atu hatauk joventude sira. 

Nune’e, Komando Polisia Estasaun Becora Felis Tilman hateten, nia parte mak sai hanesan komando iha loron 16 fulan-Junu 2012 ba iha Hera, tanba situasuan iha area ne’eba joventude sira taka dalan ho ai no fatuk. “Iha loron ne’e hau mak komando duni iha Hera, antes ami ba iha momentu ne’e ami briefing antes ba fatin akontesementu tenki rona mos komando ninia orden, hau rasik tiru dala rua no segundu komandante tiru dala 1,” Felis dehan. 

Sasin ne’e rejeita tiru dala 3 bazeia ba akuzasaun ne’ebe mak halo husi Ministeriu Publiku, halo tuir relatoriu ne’ebe mak sasin ne’e rasik hatam no mos konsidera deklarasaun ne’ebe sasin sira seluk presta tiha ona iha Tribunal ne’e falsu tanba momentu ne’eba joventude sira taka duni dalan ho fatuk no ai mesak boboot. 

 Nia hateten, tiru dala 3 deit maibe tiru tan seluk ne’ebe hamate vitima Armindo nia la hatene no hatene deit mak vitima kanek maibe tanba saida nia parte la hatene maske halo relatoriu hodi haruka ba iha komando Distritu Dili. Tribunal koletivu desidi adia audensia ne’e ba loron 25 Junu 2013 hodi rona leitura akordaun ba arguidu nain rua. 

.